Wexto ke Qirkerdişê Roboskî amebi kerdene çar parçeyanê Kurdîstanî de şîno neteweyî amebi îlankerdene. Labelê dejo giran ê nê qirkerdişî tim zerrîya roniştoxanê Roboskî de yo.

Rixmo ke serê qirkerdişî ra 9 serrî derbaz bîyî hema zî Roboskî de rêçê qirkerdişî esto. Qirkerdişî ra dima seba merdimanê qurbanan hînî wext bibi di parçe: qirkerdişî ra verî û qirkerdişî ra dima. Êyê ke serra 2011î de doman bîyî nika ciwan ê. 

Cansele û Muammer Encu zî wexto ke kekê înan Muharrem amebi qetilkerdene doman bibî. Verî zî waya înan 2003 de qezayêkê trafîkî de dinyaya xo bedilnabi.

Waye û bira vanê ke nê qirkerdişî zaf tesîrê înan kerdo. 

Muammerî şewa qirkerdişî keye de kay kerdêne û seba ke doman bi vengê bombayan ra tersayo. Muammer vano: ''A şewe seba ke çîyêk nêbo kekê mi mi dûayî kerdî.''

Wexto ke dadîya înan cayê qirkerdişî ra agêraye û verar şîya ci fam kerd ke kekê ci kişîyayo. Muammer vano ke ey kekê xo ra zaf hes kerdêne û wina dewam keno: ''Seba ke birayê mi tim mezgê mi de bi ez nêeşka mekteb de ser bikewa. Bi zorî mi lîse qedîna. Dima mi nêwaşt ke ez biwana.''

Cansele wextê qirkerdişî de 9 serre bîye. Qirkerdişî ra dima Cansele 2 mengan nêwaşt şora dibistane. Cansele vana: ''Wexto ke birayê mi yeno mi vîrî hêrs keweno zerrîya mi.''

Cansele dima wextêk waşt biba avûkate û hesabê Qirkerdişê Roboskî bipersa. Dima ke Mehkemeya Qanûnê Bingeyî dosyaya qirkerdişî red kerde Cansele reyna waşt ke huqûq biwana.

Cansele vana: ''Ma tên awazenê ke na dewa biqeda û sûcdarî bêrê cezakerdene.''

Ciwanê bînî yê Roboskî zî sey Cansele û Muammer pê dej û hêrsî pirr ê. Nê ciwanî zî bîyî parçeyêkê têkoşînê edaletî yê keyeyan ke 9 serrî yo dewam keno.