Tarîxê kurdan hem pê serewedaritiş û xoverdayîşan hem zî pê qirkerdişan pirr o. Nê qirkerdişan ra yew zî Roboskî yo. Herêma Robozîkî ya ke tede armenîyî ciwîyayêne Qirkerdişê Armenîyan ê 1915î de bêarmenîyan vera dîyaye. Dima nameyê herême zî vurîya bi Roboskî. Na herêma qirkerdişan de tewr peyêne 28ê kanûna 2011î de 34 kurdî hetê teyarayanê şerî yê F16î ameyî qetilkerdene.

Dima ke komara Tirkîya ronîyaye bazirganîya seserre bîye 'qeçaxîye.' Roboskî verê rayîrê bazirganîye yê Başûrê Kurdîstanî de bîyî.

Îtîrafê qirkerdişî yê leşkeran

35 dewijê Roboskî seba ke bazirganîya sînorî bikerê sey her wextî şewa 28ê kanûna 2011î de zî kewtî rayîr. Leşkeranê verê sînorî tim nînan ra pere girewtêne û wina destûr dayene bazirganîye. A şewe leşkeran wina vatbi: ''Beno ke no seferê şima yo peyên o.''

Nê îtîrafê leşkeran ra çend saetan dima 34 dewijî û qantirê înan bi hawayêkê barbarî ameybî qetilkerdene. Dewijî wexto ke agêrayêne dewa xo teyarayanê şerî yê F16î mabênê saeta 21:37-21:24 de ê dayî bombayan ver. Nê 35 kesan ra têna Servet Encu weş mend. 34 kurdî û qantirê înan qirkerdiş de bîyî parçe bi parçe.

Tedaya dewlete

Qirkerdişî ra dima cenazayî wedarîyabî Nêweşxaneyê Qilebanî. Keyeyan waşt ke cenazayî cayê xo de defin bikerê. Selahîyetdar û leşkeran seba ke nê waştişî asteng bikerê zaf xîret kerd. La netîceya xoverdayîşê wekîlanê BDPyî û dewijan de dewlete gamêke apey eşte. Bi mengan şîn û zîyaretanê paştdayîşî dewam kerd. Serrgêra qirkerdişî de hema zî merasîm û aktîvîteyê yadkerdişî dewam kenê. La bêşik dejê keyeyanê Roboskî dewam keno.

Tesîrê Qirkerdişî

Îqtîdar û medyaya dewleta tirke zî seba ke qirkerdiş bikerê meşrû destê înan ra çita ameyo kerd. Serekwezîrê ê çaxî Erdoganî hêverî îdîa kerd ke 34 kurdî 'PKKyîj bîyî', dima vat 'eşkîya bîyî' û tewr peyên zî vat 34 kurdî zî 'qeçaxçî bîyî.' Bi nê hawayî qirkerdiş hetê Erdoganî ra ame meşrûkerdene.

Rixmo ke qirkerdişî ra 9 serrî derbaz bîyî kiştoxî nêameyî hukmkerdene.

Proseso huqûqî

Qirkerdişî ra dima seba ke faîlî bêrê hukmkerdene keyeyanê Roboskî dest pê têkoşînê huqûqîyî kerd û muracatê pêro rayîran da. La netîceyêke nêvisîyaye dest. Seba ke dokumentî kêmî bîyî Mehkemeya Qanûnê Bingeyî (MQB) muracatê keyeyan red kerd. Keyeyanê Roboskî ard ziwan ke ê hem vera mehkeme hem zî vera avûkatanê ke dokumentê nêmcetî erşawitî hêrs bîyaye yê.

Zulmê vera keyeyan

Nê mîyanî de keyeyê Roboskî maruzê destbendkerdiş, tepiştiş, tehqîqat û hukman mendî. Keyeyê ke şîyê serê goranê domananê xo ameyî hukmkerdene. Dewlete bi hawayêkê zelalî înan rê vat ke a nika zî ê weşan ra qesasê xo gêna.

Bi nê hawayî Qirkerdişê Roboskî ra 9 serrî vîyartî. Roboskî ne oyo peyên ne zî oyo verên bi. Qirkerdişê vera kurdan hema zî dewam kenê. Faîlê qirkerdişan ê bînan zî nêameyî cezakerdene. La keyeyê Roboskî seba ke hesabê domananê xo bipersê hema zî têkoşînê xo yê seba edaletî dewam kenê.