Wekîla Têgêrayîşê Goranî Gulîstane Seîd û ê YNKyî Rêzan Şêx Dilêrî derheqê hêrişanê dewleta tirke yê vera Başûrê Kurdîstanî de vat ke hêrişê dewleta tirke qirkediş ê û venga wekîlan da ke wa bêveng nêmanê.
Kampanyaya îmza ya ke seba ke leşkerê tirkî yê îşxalkerî erdê Başûrê Kurdîstanî ra bêrê vetene dîyaye destpêkerdene, dewam kena. Heta nika 16 hezar arê dîyayî.
Wekîlê Herêma Kurdîstanî yê Têgêrayîşê Goranî Gulîstane Saîd û Wekîlê Iraqî yê Yewîya Neteweyîye ya Kurdîstanî (YNK) Rêzan Şêx Dilêrî paştî da kampanyaya îmza. Wekîlan hêrişê dewleta tirke yê vera Başûrê Kurdîstanî ercnayî.
Wekîla Goranî Gulîstane Saîd vat: ''Hêrişê dewleta tirke binpaykerdişê heqanê merdiman ê. Dewleta tirke hem mudaxeleyê erdanê Iraqî hem zî ê Herêma Kurdîstanî kenê. Ganî nê hêrişî hînî biqedê. Hêrişê dewleta tirke zerarê madîyî danê, çunke Başûr de çimeyo verên ê debarî zîret o. Dewleta tirke qirkerdiş kena, demografîye Başûrî vurnena. Neteweyê Yewbîyayeyî vera nê hêrişan bêveng ê. Hukmatê Iraqî û Hukmatê Herêma Kurdîstanî ganî nê hêrişan vindarnê. Ez seba kampanyaya îmza ciwanan rê serkewtiş wazena. No wezîfe wezîfeyê pêro kurdan o. Karê înan rûmetên o. Ez hêvî kena ke kampanya armancê xo do bîyara ca.''
Rêzan Şêx Dilêrî zî derheqê îşxalê tirkan û kampanyaya îmza de nê çîyî vatî: ''Dewleta tirke sînoranê ma binpay kena. Qezayanê ma ser o bombayan varnena û sivîlan kişena. Ganî Iraq cade cewabê nê hêrişan bido û leşkeranê tirkan erdê ma ra vejo. Aseno ke mabênê Iraq û Tirkîya de pêkerdişêk esto ke hende baregeh û leşkerê ci tîya de estê. Mabênê Tirkîya û DAÎŞî de cîyayîyêke çin a. Iraq mesuldarê hêrişanê Tirkîya yo. Ganî nê hêrişî bêrê vindartene. Tirkîya pê bahaneya PKKyî hêrişê Başûrî kena. Ganî Tirkîya meseleyanê xo zereyê xo de çareser bikera. Ganî wekîlî vera hêrişan bêveng nêmanê. Kampanyaya îmza tewirêko hol o. Destê înan tern bê.''
