Dêrsim de wendekaranê Unîversîteya Munzurî semedê embaza xo Gulîstane Doku ya ke hewteyêk o ci ra xebere nîna girwtene waşt ke çalakîyêke virazê. Polîsan hêrişê wendekaran kerd. Rixmê hêrişê polîsan eşkerayîye ameye dayene û rayraşîyayîş ame kerdene.

Eşerayîye de ame waştene ke wa qewimîyayîş bêro roşnkerdene û cayê embazê Gulîstane Doku Zainal Abarakovî yo ke sey şikdarî yeno zanayene û yeno vatene ke remayo teberê welatî ame persayene û ame vatene ke eşkerayo ke serê tayê çîyan yeno guretene. Wendekaran selahîyetdaran ra waşt ke  wa şarî mexapînê û  derehqê qewimîyayîşî de zanayîş bidê. Çalakwanan vist vîrî ke her kuçeyê Dêrsimî de kamerayî estî û rixmê name Doku heta nika nêameya vînayene û vat ma heta peynî do kuçeyan de bê.

Badê eşkerayîye kîtleyî  bi tîlîlî û sloganan dest bi rayraşîyayîşî kerd û rixmê hêrişê polîsan heta meydanê bajarî şîyî. Verê Şaredarîya Dêrsimî de polîsan  bi TOMAyan hêriş kerd û gazê îsotî şuxulna. Wendekaran bi slogana‘‘ Wendekaran rê ney qetilkaran rê barîkat‘ cewab da hêrişî. Badê hêrişê polîsan kîtle reyna heta Meydanê Seyîd Rizayî rayra şi û bi sloganan çalakîya xo qedînaye.