Beyanatê cîhanî yê heqanê merdiman de “bi ziwanê maye perwerde” bi hawayêko taybetî ameyo nîşankerdene. Labelê Tirkîya de bi serran o kurdkî ser o teda esto. Tirkîya de nê serranê peyênan de gelekî dibisitanê taybetî amey girewtene, radyo, rojname, televîzyon û ajansê xeberan ê kurdî bi KHKyan amey girewtene.  Vakurê Kurdîstanî û Tirkîya de kurdkî ser o teda sewîyeya tewr berze de yo û reyna kitabê kurdkî zî yenê qedexekerdene. Wayîrê Weşanxaneyê J-J Azad Zalî, kurdkî ser o teda û zorî nirxnayî û ard ziwan ke dewlete bi polîtîkayêk weşanxaneyanê kurdkî rê teda kena û ganî kurdî weşanxaneyanê kurdî rê wayîr vejîyê. ,

Zalî ard ziwan ke weşangerîya kurdkî demêkê krîtîk de ya û wina dest pê qiseykerdişê xo kerd: “Nê dewrê girîng û krîtîkî de dîzaynêko newe kurdan rê lazim o. Tena weşangerîya kurdkî ney, weşangerîya dinya tehluke de ya. Weşangerîya nikayî kaxide ser o yana kerdene la her ke şono teknolojî aver şono û komel kaxide ra dûrî keweno. Her ca de teknolojî vila bîyo û komel teknolojî xebetneno, êdî kovar, kitab, rojnameyê ke yenê çapkerdene nênê wendene. Komel komputur û telefonan ser o rojnameyan waneno. Ganî pêro weşangerîya kurdkî xo gore na rewşe newe ra dîzayn bikera. Taye cayanê dinya de taye weşangerî gore bi şertanê nê dewrî tevgerenê. Ganî weşangerîya kurdkî xo nê dewrî de zî aver bera.”

Zalî bale anite tedayanê ke weşangerîya kurdkî ser o yenê kerdene ser û dewam kerd: “Tirkîya de weşangerîye ser o tedayê pêtî estê. Hetê ra dewlete nêwazena ke weşangerîya kurdkî aver şora. Wazena ke deskewteyanê kurdanê ke bi xoverdayîş ameyê girewtene bipelexna. Zaf berhemê kurdan hetê dewlete ra ameyê qedexekerdene. Gelek sazî û dezgehê kurdan zî ameyê girewtene. Reyna vilakerdişî ser o zî qedexeyî sewîya berze de yê û hetê aborî ra zî wazenê verê weşanxaneyanê kurdkî bigerê. Ma sey weşangeranê kurdkî wazenîme ke pêro Kurdîstan, Tirkîya û dinya de kitabanê xo vila bikerê. La çi heyf ke ma rastê qedexe û astengîyan yenê. Dezgehê vilakerdişê yê Tirkîya bahaneyê  galanê nîjadperestan ra serkewte kitabanê kurdkî nêgenê.

Zalî da zanayene ke krîzê aborî yê Tirkîya weşangerîya kurdkî ser o zaf tesîr kerd û wina dewam kerd: “Demêko derg o ke Tirkîya de krîzê aborî û sîyasî esto û no krîz tesîrê her kesî keno. Nê krîzî nê dewrê peyênî de tewr zaf tesîrê weşangerîya kurdkî kerd. Vayaya kaxide bîye berze, weşangerî nêeşkenê kitaban çap bikerê. Naye ra serkewte weşangerîya kurdkî peyde şîya. Hetê çapkerdiş û vilakerdişî ra weşangerî rojanê zaf zoran vîyarnenê. Tirkîya de vilakerî zaf bîyê tay, weşangerî nika xo tena fuaran de nîşan danê û o zî mesrefê fuaran gelek zêde yo, zafêrî weşanxaneyî beşdar nêbenê. Krîzî ra serkewte êdî merdimî nêeşkenê ke kitabêk zî biherînê û biwanê.”

Zalî nîşan kerd ke wendoxê kurdkî her ke şonê benê zêde û no zî seba weşanxaneyanê kurdkî serkewtişêko pîl o. Zalî wina dewam kerd: “Ma sey weşanger xo gore wendoxan dîzayn kenê. Wendoxî kotî bibê ma do xo biresnê înan. Ma hetê ê wendoxan de yê ke wazenê bi wendişî hiş û aqilê xo aver berê. Seba wendoxanê xo ma wazenê ke kitabanê başan vejê. Krîzî ra serkewte ez eşkena vaja ke pêro weşanxaneyê kurdkî kewtê sewîya krîtîke. Taye vinetê û tayênan zî nê karî ra fek vera dayo.‘‘