Komîteya Şaran û Bawerîyan a KCKyî bi wesîleya Roşanê Qurbanî mesajêko nuştekî weşana. Mesaj wina yo:

''Têgêrayîşê ma Roşanê Qurbanî  yê alemê misilmanan fîraz keno. Ma hêvîdar ê ke Roşanê Qurbanî yê 2022yî sere de Rojhelatê Mîyanênî rê, pêro alemê Îslamî rê edalet, haştî, aramî û yewîye bîyaro. Ma hêvîdar ê ke vilakerdiş, paştdayîş, dostî û wayûbiratîya şaran bizêdîno, têkoşînê demokrasî û azadîye pîk bikero.

Roşan têkoşînê vera zalim û munafiqan û paştdayîşî temsîl keno. Nê Roşanê Qurbanî de ma hêvîdar ê ke nê hîs û fikrê şaranê Rojhelatê Mîyanênî û alemê misilmanan bizêdîyê. Ma venga şarê xo danê ke nê roşanî û her roşanî bi ruhê yewîye fîraz bikero.

Seke zanîyeno sere de Kurdîstan de erdê misilmanan de sey şer, talan, feqîrî, rijîyayîş, îşxal û qirkerkerdişî polîtîkayê newete-dewlete û hukmatanê faşîstan yenê kerdene. Rejîmo faşîst ê AKP-MHPyî binê nameyê Îslamî de bi hawayêkê nîjadperestî hêrişê kurdan keno. Dewleta tirke dînî îstîsmar kena, her roje zulmê kurdan, cinîyan û ciwanan kena. Rejîmo qirker ê dewleta tirke seke ewnîyeno xenîmetî ra, ewnîyeno Kurdîstanî ra. Sere de kurdê misilmanî ganî pêro kurdî bizanê ke zemînê îdeolojî yê kolonyalîzmî ferasetê îslamê tirkî ra vejîyayo. Îslamê Muhammedî kurdanê misilmanan rê ferz kerdo ke vera îstîsmaranê munafiq û zaliman ê Îslamî têkoşîn bikerê. Ma venga şaranê Rojhelatê Mîyanênî û kurdanê misilmanan danê ke têkoşînê vera polîtîkayanê dewleta tirke ya faşîste qasê îbadetan fîraz o.

Dewleta tirke bi nêzdîbîyayîşê xo yê vera kurdan mojna ke a dînî îstîsmar kena û ayetanê Homayî îstîsmar kena. Goreyê bawerîya Îslamî çîyo ke Hımayî afernayo, şarê kurdî, ziwanê kurdkî û erdê Kurdîstanî sey ayetannê Homayî est ê. Dewleta tirke hêrişê nînan kena, cuya kurdan sey sûcî vînena, qirkerdişan kena, koy û deştan bi kîmyewîyan dana bombayan ver, xoza talan kena, merdiman qetil kena, firsend nêdana ke kurdan bi ziwanê xo biciwîyê û coka Homayî înkar kena. Dewleta tirke hêrişê Herêmanê Pawitişî yê Medya, Rojawan, Başûr û şarê kurdî kena, coka merdimî erdê xo ra koç kenê. Ma venga tirk, ereb, kurd û şaranê bînan danê ke wa nêbê şirîkê gune û sûcanê ke nameyê Îslamî ser o yenê kerdene. Her tewir û têgêrayîşo ke do paştî bido rejîmê qirkerî yê AKP-MHPyî, ci rê zemînî awan bikero û cesaret bido ci, yeno mana dişmenîya vera Îslamê Muhammedî. Ma seba têkoşînê vera sîstemê qirkerdişî veng danê. Misilmanê ke xo sey pawitoxê rûmet û namusê xo vînenê, vera sîstemo ke heqaretê şarê ma keno, şarê ma zîndanan de tepişeno, vêşan û feqîr verdeno têkoşîn bikerê, no têkoşîn qasê qurbanê pîlî yo û xêrîn o.

Şarê kurdî roja ke Îslam şinasnayo a roje ra nata wayûbiratîya ummetî xo rê kerda esas. Şarê kurdî 40 serranê peyênan de têgêrayîşê azadîye reyde xîret keno ke nê kulturî rê dewam bikero. Roşanê Qurbanan ê 2022yî eşkeno rayîrê ney abikero ke şarê kurdî nê kulturî reyde ameyoxêkê azad û demokratîkî şaranê bînan rê awan bikero, seba ney zî hişmendîya neteweya demokratîke xurt bikero, rêxistinîya demokratîke hîna zaf aver bêro.

Misilmanê Kurdîstanî yê ercîyayeyî;

Nê Roşanê Qurbanî de ganî şehîdgehan zîyaret bikerê û duayê xerî înan rê bikerê. Ganî tepişteyanê azadîye zîyaret bikerê, paşyî bidê keyeyanê şehîdan û tepişteyan. Zîyaret û paştdayîş kulturê roşanî ra yê. Ma wazenê bi taybetî bîyarê xo vîrî ke xêr û qurbananê xo bidê ê kesan û dezgehanê ke resnenê hewcedaran. Ma pê bawer ê ke xêr û hetkarîya dewleta tirke ya qirkere û kes û dezgehanê înan do nêrê qebulkerdene.

Nameyê Têgêrayîşê Azadîye yê Kurdîstanî ser o ma pê nê hîs û fikran Roşanê Qurbanî yê keyeyanê şehîdan, misilmananê Kurdîstanî reyna fîraz kenê. Ma venga misilmananê Kurdîstanî danê ke vera dewleta tirke ya înkarkere, qirker û faşîste têkoşînê rêxistinkerdeyî bikerê. Bi wesîleya roşanî ma reyna şehîdanê têkoşînê azadîye yê Kurdîstanî şexsê şehîdanê Zap, Avaşîn û Metîna de yad kenê û perwerîya xo ya bi înan reyna anê ziwan.''