Dewanê Tornavan, Yarimqa, Hacelî, Axurîk, Şamsatîn û Segdibegî yê qezayanê Qelqelî û Seravê yê Wanî de çend rojî verî laser weriştbi û netîceya ney de 150 heywanî merdbî, bi hezaran donimî xapînî mîyanê awe de mendbî. Nê warê laserî serê sînorê Îranî de yê. Rixmo ke sînorê Îranî bi dêsanê betonînan girewte yo û xendekê 'asayîşî' est ê felaketê laserî qewimîya.

Laserî ra dima Walî-Qeyûm Ozan Balciyî, Fermandarê Cendirmeyan ê Wanî Tuggeneral Huseyîn Bekmezî û Mudirê Asayîşî yê Şaristanî Atanur Aydinî herême zîyaret kerde. Wextê zîyaretî de dewijan vera nînan nêrazîbîyayîşê xo mojna û vat: ''Gelo şima seba fotograf girewtişî ameyê?'' Nêrazîbîyayîşî ser o pawitox û cendirmeyan mudaxeleyê dewijan kerd û ê herême ra dûrî vistî. Walî-Qeyûm Ozan Balciyî dima qoricîyan reyde fotografî girewtî û xîret kerd ke bimojno ke ey dewijan de qisey kerdo.

Hemşaredarê Qelqelî Yakup Almaço ke herinda ci de qeyûm amebi tayînkerdene, derheqê babete de qisey kerd û dîyar kerd ke xendekê serê sînorî zerarêkê pîlî danê xoza û rîskanê sey laserî zêdînenê. Almaçî vat: ''Bi taybetî nê xendekî zaf tehlukeyîn ê. Sebebê laserî yo tewr pîl nê xendek ê ke bi îdîaya asayîşî virazîyayê. Ma dewijî zîyaret kerdî. Ma do heta peynî babete teqîb bikerê.''