Serekkomarê Tîrkîya Teyyîp Erdogan û Wezîrê Karanê Zereyî Suleyman Soyluyî beyanatî dayîbî û wina vatbî: “HDP partîyêka legale û qanûnîye nîya.” Qaşo CHP û ÎYÎ Partîye zî cewab daybî ci û vatbî, ‘eke legal nîyo HDP’yî bigîrê’. 6 mîlyon kesê ke reye xo dayê HDP’yî na rewşe ver acîzê.  Parlamenterê HDP’yî yê Wanî Mûazzez Orhane û Mûrat Sarisaçî no derheq de va: “HDP’yî no bajar de se ra 75 reyî girewtê. Eke Soylu wazeno rastîye bimuso, bêro bikewo mabênê şarê tîyayî.”

Parlamenterê HDP’yî yê Wanî Mûrat Sarisaçî bale ante meşrûîyetê ser û va AKP û Soylu meşrû nîyê û wina dewam kerd: ”Meşrûbîyayîşê HDP’yî şarî ra yeno. Partîyî meşrûîyetê xo Wezîrê Karanê Yereyî ra nê, şarî ra gênê. Bi vatişanê Soyluyî ma vînenê ke cîdîyetê dewlete nêmendo û bî gefwendiş û îftîrayan kenê ke weçînayîşî de ser bikewê. Eşkera yo ke xoverdayîşanê grevê vêşanîye hukmat zaf tersnayo û coka wina hêriş kenê. La se kenê bikerê, ê do nêeşkîyê goreyê waştişê xo netîce bigîrê.”

KENÊ KE BI ZORDARÎYE U ZURAN NETICE BIGÎRÊ

Parlamentere Mûazzez Orhane zî qiseykerdişê xo de va AKP xeylî wexto keno ke partîyanê sîyasîyan ê Kurdan krîmînalîze bîkero û wina dewam kerd: “Peyê nê beyanatan de rastîya hêzê grevanê vêşanîye yê vera tecrîdî û serkewtişê HDP’yî yê 31’ê Adare estê. Tersenê. Tersanê xo ver, kenê ke bi zordarî û zuran netîce bigîrê. Ma nê beyanatan ra fehm kenê ke polîtîkayê AKP’yî qedîyayî û êdî nêeşkenê soz bidê şarê herême. AKP hem hetê sîyasî ra, hem zî hetê ekonomîyî ra zereyê qrîzî de yo. Naye ra zî keno ke mabênê şarî bişatno, biverdo pê û bi no qeyde îqtîdarê xo bidomno.

Seba ke weçînayîşê 31’ê Adare de ser bikewo wina keno. Keno ke îtîfaqo ke vera îqtîdarê AKP’yî ameyo viraştene bibo vila. Bi manîpulekerdişê HDP’yî wazeno ke Kurdî bikerê vîndî û o bi xo qezenc bikero. HDP goreyê fikrê înan siyaset nêkeno. Ma hêzê xo şarê xo ra gênê û derheqê weçînayîşê 31’ê Adare de ma şarê xo ra bibawer ê.”