Fermandaranê HPGyî ra Rizgar Êrsîyî Cengê Heftanînî, xoverdayîşê gerîlayan û hêrişê dewleta tirke ANFyî rê ercnayî.

Qiseykerdişê Fermandar Rizgar Êrsîyî ra beşêk wina yo:

''Serra 2016î ra dima dişmenî taktîkê xo vurnayî. Serra 2016î ra nata koyanê Cîlo, Zagros, herêmanê Ertûş û Avaşînî de operasyonê hîrayî yenê kerdene. Serra 2018î ra nata zî Xakurkê de operasyonî yenê kerdene. La artêşa tirke nêeşkena qet yew netîce zî bigêra. Serrêke ra nata Heftanîn de operasyonê dişmenî dewam kenê. Dişmenî hêvî kerdêne ke heta 30ê tebaxe ser bikewo la wina nêbi. Gerîlayî Heftanîn de xoverdayîşêkê bêhempayî kenê.

Dewleta tirke armanc kena ke pêro Kurdîstan îşxal bikera. La gerîlayî rayîr nêdanê naye. Rayberîya embaz Zagrosî de girê Partîzanî de ma derbê giranî dayî dişmenî ro. Reyna rayberîya Şehîd Merwanî de hêrişê dişmenî ameyî pûçkerdene. Girê Konferansî de û cayanê bînan de çalakîyê gerîlayan dewam kenê.

Dewleta tirke armanc kena ke sînorê Mîsak-i Mîllîyî reyna bivisna dewre. La armancê xo eşkera nêkena. Bi bahaneya PKKyî hêrişê Başûr û Rojawanî kena.

16ê hezîrane de teyarayê şerî dekewtî Heftanîn û nînan herême daye bombayan ver. La gerîlayî vejîyayî verê nînan. Gerîlayan Dûpişk, girê Şehîde Bêrîvane û xeta Kato Selê de derbê giranî dayî dişmenî ro. Coka dewleta tirke nêeşkaye xetêke zî bigêra. O çax dişmenî waşt ke hêrişê kêlekan bikera û verê xo da Qesrokî. La reyna zî derbê giranî werdî. Na serre tewr tay 200 çalakîyî ameyî kerdene. Zafêrê înan bi serkewtişî qedîyayî.

Dewlete emser zêdêr qoricîyan erzena verî. Dewleta tirke zanena ke a nêeşkena pê leşkeranê xo ser bikewa coka qoricîyan û kontrayan erzena vernî.

Tewr peyên Pîrbûla û Minîn de şer qewimîya. 8ê tebaxe de Pîrbûla de xoverdayîşêko pîl ame kerdene. Fermandare Warşîne û embazê bînî şehîd bîyî. Uca de zaf leşkerî meydana şerî ra remayî la medyaya tirke naye ra behs nêkena.

Hedefê dewleta tirke îşxalê Başûrî yo. Nika leşkerî sînorê Silêmanî de ca bîyî. 400 yan zî 500 dewê Başûrî ameyî vengkerdene. PKK sebebê nê çîyan nîyo. Nê pêro bahane yê.

Eke verê dewleta tirke nêro girewtene herême de binê serwerîya dewleta tirke de eyaletêkê Osmanijê neweyî awan bikera. Coka wazena Rojhelatê Mîyanênî û Kurdîstan îşxal bikera. Coka xoverdayîşê gerîlayan hende girîng o. Ma seba pawitişê erd û şarê xo xeylêk şehîdî dayî. Wa çew pê dewleta tirke bawer nêkero.  Raştîya aye qirkerdiş o. Gerîlayî erjanê merdimîye pawenê. Rayberê ma tecrîdkerde yo, o û şarê ma xo ver danê. Gerîlayî zî 40 serrî yo ke xo ver danê.

Gerîlayî xizmetê erd û şarê Kurdîstanî kenê. Ganî şarê ma yê Başûrî zî naye bivîno û pê dewleta tirke nêxapîyo. Erdogan û Bahçelî hêrişê Parlamentoya Başûrî kenê. Bahçelî pê keyeyê Barzanîyî heqaret keno. Çimanê înan de kurdî û tirkî sey ci nîyê.

Serrêke derbaz bîye. Dewleta tirke pê pêro îmkananê xo hêrişê ma kerd la çîyêk nêvist destî. Dewleta tirke Heftanînî ra zaf dersî vetî. Artêşa tirke de sendromêk virazîya. Leşkerê ci ya xo nêweş kenê yan zî erzenê war.

Gerîlayî Heftanîn de rûmetê şarê kurdî pawenê. Ma pê bawer ê ke şarê ma do na raştîye bivîno. Şarê ma zaf qirkerdişî dîyî la qet îradeyê xo teslîmê dişmenî nêjerd. Ma na hîşyarîya şarê ma fîraz kenê. Ganî şarê ma vera ajananê MÎTî hîşyar bibo.

Ez embazanê ma yê ke Cengê Heftanînî de şehîd bîyî bi rêzdarî yad kena, selam kena têkoşînê înan û gerîlayanê ma rê serkewtiş wazena.''