Spekulasyonê dewleta tirke yê ke vanê 'hînî çew tewrê PKKyî nêbeno' hetê çar gerîlayanê HPGyî Rohat Faraşîn, Rojhat Çemçemal, Qendîl Rojava û Ezîz Qaîmî ra ameyî pûçkerdene.

Gerîlayê HPGyî Qendîl Rojavayo ke ereb o vat: ''Mi Şorişê Rojawanî de dewaya kurdan nas kerde. Ez serra 2020î de tewrê PKKyî bîya. Dewleta tirke vana têna kurdî PKK de ca gênê. Felsefeya Rayber Apoyî de mabênê şaran de sînor çin ê. Nêzdîbîyayîşê Iraq, Tirkîya û Sûrîye yê vera kurdan xelet o. Temsîlê azadîye fikr û felsefeya Rayber Apoyî û xeta şehîdanê şorişî de yo.''

Gerîlayê HPGyî Ezîz Qaîmo ke serra 2020î de tewrê gerîlayan bi vat: ''Bi keda Rayber Apoyî Rojawan de şoriş ame kerdene û nika esasê fikrê Rayber Apoyî ser o komelê Rojawanî xo rêxistin keno. Mi azadîya raştikêne PKK de şinasnaye. Êyê ke wazenê  bi hawayêkê azadî biciwîyê wa bêrê tewrê PKKyî bibê.''

Gerîla Rohat Faraşînî vat: ''Artêşa tirke bêçare mende. Ewro rayberîya gerîlayanê HPG û YJA-Starî de, teknîko NATOyî yu tewr aver ame pûçkerdene û gerîlayî derbanê giranan danê artêşa tirke ro. Şarê herême şahîd o ke leşkerê tirkî Cengê Heftanînî de kewtê sendromê binkewtişî. Her roje psîkolojîya artêşa tirke xeripîyena.''

Gerîla Rojhat Çemçemalîyo ke serra 2014î de tewrê gerîlayan bi, vat: ''Dişmen pê teknîkê xo zaf bawer o la gerîlayî bi xoverdayîşê xo dişmen çin kenê. No xoverdayîş tesîrê şar û gerîlayan zî keno xora. Bi taybetî şarê Başûrê Kurdîstanî ganî  tarîx û raştîya Kurdîstanî de xorinîyêke virazo. Ez hêvîdar a ke ciwanê Başûrê Kurdîstanî do na zorbazîye qebul nêkerê, sere wedarê û bi xurtî tewrê gerîlayan bibê.''