Xoverdayîşê Yagizî 3 mengî xo dima verdayî

Nasir Yagizo ke hemverê tecrîdkerdişê Rayberê Şarê Kurdî Abdullah Ocalanî Hewlêr de grevê vêşanîye yê bêdem û bêagêrayîşî de yo, 3 mengî xo pey de verdayî. Halê weşîye yê Yagizî roj bi roje xirab bena.

Çeqiqa xoverdayîşê zîndanan ê grevê vêşanîye ya ke hemsereka KCD’yî û parlamentera HDP’yî ya Colemêrgî Leyla Guvene zîndan de panabî, Hewlêr de bi çalakîya welatijê Vakûrê Kurdistanî Nasir Yagizî pîl bîye. Çalakîya Nasir Yagizî 3 mengî xo dima verdayî û çende şino weşîya ci bena xirab.

Hemserekê Temsîlkarîya HDP’yî ya Başûrê Kurdistanî Abid Îkeyî derheqê halo peyên ê Yagizî de ANF’yî rê vat: “Çalakîya Yagizî 3 mengî xo dima verdayî. Halê ê yê weşîye giran o. Nêeşkeno rakewo, virêjeno, serre û linganê ê de dej esto û nêeşkeno hurzo payan.”   

Îkeyî dewam de vat: "Gama rakeweno heta nîmeroj nêeşkeno bibo haya. Yagizî xeylî kîlo daya. Hetê şimitişan ra zî problemêko ê yo cidî esto. Wucûdê ci her ke şino helêno, her roja ke şina kîloya ci bena kemî. Hetê bawerî, moral û zerrdarîye ya bi Rayber Apoyî ra qerardar o. Na çalakîya xo ya grevî zî kemî vîneno, wazeno çîyanê hîna pîlan bikero. Tecrîdî û bicaardişanê zîndanan qebûl nêkeno, bicoş, bimoral û qerardar o." 

Vizêr endama Meclîsê Îştarî Fedîle Toke ke hemverê tecrîdkerdişê Rayberê Şarê Kurdî Abdullah Ocalanî mengêk o grevê vêşanîye yê bêdem-bêagêrayîşî de ya şîye serdana Yagizî.

YAGIZÎ MHME, CPT Û KONSEYA EWROPA RÊ MEKTÛB ŞIRAWIT

Endamê Meclîsê HDP’yî Nasir Yagizî roja 39’ine ya grevî de Mehkemeya Heqanê Merdiman a Ewropa, CPT û Konseya Ewropa rê mektûb şirawitibi. Mektûbê Yagizî wina yo:

"Ez Nasir Yagiz, serra 1992 de Vakûrê Kurdistanî bajarê Êlihî de amîya dinya. Hewna ke doman bîya rastê asîmîlasyonê ziwan û kulturî amîya, me dejê zaf pîlî antî. Serranê ciwanîya xo de seba nasnameyê xo yê Kurdî ez bîya hedefê hêrişanê dewleta Tirkî ya îşxalkare.

Gama mi mucadeleyê xo yê sîyasîyî rayra berdêne, seba ê xebatanê xo yê partîya sîyasîye kewta zîndan. Dimayo ke serbest bîya, cezaya mi ya zîndanî amî tesdîqkerdene. Dima ra ez bîya koçber û mi surgun nas kerd. Nê 9 mengî yê ez Hewlêr ê Başûrê Kurdistanî de sey multecîyêk ciwîyena.

Peymananê heqanê merdiman de yeno vatene ke merdimî bi heqanê xo yê xozayîyan yenê dinya, la sey bi mîlyonan Kurdan ez zî hetê dewleta Tirkî ya îşxalkare ra nê heqan ra bêpar amîya verdayene. Her Kurd seke Rayber Abdullah Ocalano ke 20 serrî yo bi tecrîdî ˆİmrali de tepişte yeno girewtene nê heqan ra bêpar ameyo verdayene.

Şexsê Rayberê Şarê Kurdî Bbirêz Abdullah Ocalanî de serê şarê Kurdî de metodê teberê huqûqî û yê îşxalkarîye yenê bicaardene. Tecrîdêko bênimûne û teberê merdimîye serê Birêz Ocalanî de yeno ferzkerdene.

Seba ke şima hemverê tecrîdî de wezîfeyê xo bica nêanê, nê halî de mesuldarîya şima zî esta. Binê nê tecrîdê giranî de, tena verdayîşê Birêz Ocalanî, ez mecbûr menda ke însîyatîfêkê winayênî bigêrî ke heqê xo yê cuye bikerî tehlukeyî mîyan. Nê 39 rojî yo ke ez grevê vêşanîye de ya. Heta ke tecrîdo girankerde yê serê Birêz Ocalanî nêro wedaritene û bi rayîrê şima hayîdarîyêk ci ra nêro girewtene, ez do bi îradeyê xo yê azadî çalakîya xo açarnî rojeyê mergî.

OCALAN SEBA ŞARAN XEYLÎ MUHÎM O

Birêz Ocalan Rojakewtena mîyanêne de sebebê şer û aşitîye yo. Ê ra hayîdarî girewtiş seba şaran babetêka cuyekî ya. Ewro bi hezaran kesî bi heman waştişî grevê vêşanîye de ê û nê çalakîyî do hîna bibê pîl.Ez umîd kena ke mekanîzmaya edalet û huqûqî ya Ewropa mîsyonê xo yê tarîxîyî rê wayîr vejîyo.Ez wazena biyarî şima vîr ke nê qerarê mi de para nizdbîyayîşê şima yê hemverê nê îşkencceyî esta. Ez veng dana şima ke vero ke na çalakîye bi mergî biqedîyo bibo, şima kewenê mîyanê têgêrayîşî û anorê merdimîye ya unîversale rê wayîr vejênê."