Hîrê mengî yo hêrişê dewleta tirke yê vera koyanê Kurdîstanî û şarê kurdî dewam kenê.  Vera nê hêrişan gerîlayê azadîye bi hawayêkê xurtî xo ver danê. Dewleta tirke ya ke ha bin kewena hêrsê xo xozaya Kurdîstanî ra gêna.

Koyî û nê raywanê ci wayîrê hêzêkê pîlî yê. Nê waran de vengê bombayan, gazê jehrînî, çeka kîmyewî û teqaberî kêm nêbenê. Gerîlayê Kurdîstanî çêr ê û xozaya Kurdîstanî zî rind a. Gerîlayî serê her gir, kerra û kendalî de şerêkê pîlî kenê. Her patîka de ke gerîlayî tira vîyartî darê welî, serê kerreyan de rêçê guleyan asenê. Gerîlayî cinî û camêrdê şarê kurdî yê. Ê tornê Şêx Seîd, Seyîd Riza û Rindê xan ê. Ê seba ke erjanê xo û xozaya xo bipawê hê şer kenê. 

Nê patîkayanê dergan de şewatê pîlî zerrîya merdiman dejnenê. Cenetê na dinya de, herra tewr rinde ya dinya de şewatî yenê vetene. Vilê rindî nê adirî de bîyî wele, darê ci yê qedimî vêşayî. Her gama nê erdî de destanêkê gerîlayan nusîyayo. Coka dewleta tirke têna vera gerîlayan û PKKyî nê vera her sîstemê gandaran şer kena. Hewa, xoza, awe, darî û çîyê bînî benê hedefê dewleta tirke.

Koyê Kurdîstanî, Zap, Metîna, Avaşîn, Besta û Licê her roje vêşenê. Erd û asmên mîyanê adirî de yo. Gerîlayê azadîye her şewatî de reyna sozê qesasî danê. Bo şerê xoverdayîşî yo. Têna gerîlayî nê xozaya Kurdîstanî zî mîyanê xoverdayîşî de ya. Çem û robarê welatî, Avaşîn, Basya, Tabur, Dîcle pêle bi pêle cış benê. Tîje rixmê pêro zaliman her roje xo resnena zerrîya gerîlayan û bena adirê qesasî.

Şarê kurdî tim dormeyê adirê xoverdayîşî de ameyo pêsr û xo adirî ra newe ra afernayo. Senî ke gerîlayî mîyanê xoverdayîşêkê pîlî de yê xozaya Kurdîstanî zî mîyanê adirî de vera îşxalkeran şerêkê tarîxî rê dewam kena. Coka Kurdîstan de xoverdayîş yeno manaya cuye.