Nasir Yagiz seba ke tecrîdê serê Rayberê Şarê Kurdî Abdullah Ocalanî bêro wedaritene, 107 rojî yo ke grevê vêşanîye de yo. Yagizî bi wesîlaya 8’ê Adare yew peyam pare kerd û nê vatî:

 “Hevalê cinîyî yê ke zindan û koyan de rûho azad afernayo û hevalê ma yê hêca yê ke şexsê înan de xo ver danê.  

Ewro roja xoverdayîşê Leyla Guvene yê 107’ine yo. Ez bawer kena ke no mucadeleyê ma bi moral û motîvasyonê şarê ma do hina bibo berz û bibo serkewte. Roja verî ra heta nika, her hucreya min a ke helîna mi hetê mucadeleyî ra hina kena pêt. Her xoverdayoxo ke bi bawerîya serkewtişî û bi rûhê fedaîyî çalakîya xo domneno, tecrîdî keno parçe û Raybero azad reyde Kurdîstano azad û demokratîk, şarê ma rê hîna keno nêzdî. Şorişê Rojawanî barbarîya DAIŞ’î qedîna û mîjdanîya winasîye daye ma. Wisar, hêvîyê ma yê Rayberê azadî keno rastikên û rûhê ma newe ra aferneno.

Rayberîye felsefeya ma ya xoverdayîşî ya û dişmen keno ke helmê ma bigîro. Ma zî sey rûhê seferberîya “Şima do verê roja ma nêgîrê”  biwirzê payan ser û bi roşnîya 8’ê Adare, vera roşanê Newroze xoverdayîşêko bêemsal û bêmabên bidê. Leyla Guvene do meşaleya xo biresno Newroza Amedî û ez zî biqerardarîye meşaleya xoverdayîşî do biresna mabede ma yê xoverdayîşî, yanê Newroza Qendîlî.

Bi seyan hevalê ma, her hetê dinyaye de xo ver danê. Serkeşîya cinîyanê azadan, şert û mercanê zindanan de yew îrade afernayo û pêroyê dinyaye no îrade dîyo. Ez bi no wesîla 8’ê Adare ya pêroyê cinîyan pîroz kena û serkewtişanê înan ver de vileyê xo kena çewt. Reyna tarîx bîyo şahîd ke, azadîye û haştîye ya Rojakewtena Mîyanêne û pêroyê dinyaye, ancax bi destê xoverdayîşê cinîyan mumkin a. Cinîyê azadî do komelê polîtîk û exlaqîyî biafernê.

Na çalakîya serkewteye, roja verene ya menga qehremanîye ya ma Adare de hîna bibo pêt. Pêroyê xoverdayoxanê zindananê Tirkîya do bikewê na çalakîye. Ez pêroyînan bi hurmet û heskerdiş silam kena û vana şima xêr ameyê xoverdayîşê ma. No rayîr, rayîrê ma pêroyînan o. Ganî ma layiqê nê rayîr û nê erjayeyan bibê. No rayîr rayîrê rojî yo û rayîrê hevalanê rojî yo.

Ganî bêro zanaye ke sewdaya me merg nê ciwîyayêne ya. Hevalanê ma yê ke heta nika 82 Roceyê Mergî yê Pîlan de reste şehadet, komelêko azad afernayo û ma zî hevalê ê xoverdayoxanê fedaîyan ê.  Ma seba ke rayîr nêmendo kewtê no rayîr û no rayîr do deme ameyoxî de bibo bingehê exlaqê polîtîkî yê komelî. No tercih tena ê ma nê ê şarê Kurdî yo. Ganî ma bibê layiqê xoverdayoxanê xo tarîxîyan û bedelê xo çi beno wa bibo ganî ma do bibê serkewte.

Ma no rayîr de bimirê zî, felsefeya ke hetê Rayîrberîya ma ra ameya afernayêne do miheqeq bibo serkewte. Na paradigma do heta deqayanê ma yê peyênan de zî moral û motivasyon bido ma. No wisar do bibo wisarê Kawayî. Ez bawer kena ke Rayberê ma do bibo azad û bêro mabênê şarê xo. No wisar do bibo wisarê serkewtişî.

Ma hevalê Kemalan û mazluman ê û bi  na hevaltîye serêberz ê. Ma vera tecrîdî, vera îşxalî  serê xo nênamna û ma do nênamnê zî. Kurdîstanî tim bi şehîdanê xo serê xo berz girewt û o do serêberz bimano.

Ez bi nê hîsîyat û bawerîyan şima pêroyînan silam kena. No wisar do bibo wisarê serkewtişi.”