Leyla Guvene, seba ke tecrîdê serê Rayberê Şarê Kurdî Abdullah Ocalanî bêro wedaritene dest bi grevê vêşanîye kerdîbî û grevî 132 rojî peyde verdayî. Grevê vêşanîye pêro hepisxaneyan de bîyê vila. Zulkuf Gezenî Hepisxaneyê Tekîrdagî de, seba ke tecrîdî protesto bikero çalakîya fedaîyîye kerde û şehîd kewt. Polîsan dest nabi cenazeya Zulkuf Gezenî ser û cenaze binê ablukaya polîsan de ameye defînkerdene.

Temsîlkaranê Yewîya Hêzî ya Şorişgêre ya Dêrsimî zî waşt, seba ke hîna zêde mergî nêbê wa tecrîd bêro wedaritene û talebî bêrê qebulkerdene.

GANÎ TEK ROJDEM GREVÊ VÊŞANÎYE BO

Namzeda Şaredarîya Dêrsimî ya Yewîya Hêzî ya Şorişgêre ya Dêrsimî Nurşat Yeşîle bale ante grevanê vêşanîye ser û wina va: “Ocalan binê tecrîdî de yo û şar seba ke tecrîd bêro wedaritene payan ser o. Grevê vêşanîye vera bêedaletî û bêhiqûqîye ameyê destpêkerdene. Merdimî seba haştîye û azadîye kewtê grevê vêşanîye. Nê çalakîyî muhîm ê. Xoverdayoxî nê taleban de heqdar ê. Talebê înan, talebê ma pêroyînan ê. Ganî ma wayîrê nê çalakîyan bivejîyê û welat de bikerê rojdemo tewr serekeyîn.“

GREVÊ VÊŞANÎYE NEWE NÎYÊ, FERQÊ CI BI VERÊNAN ÇIN A

Namzedê Şaredarîya Dêrsimî yê Yewîya Hêzî ya Şorişgêre ya Dêrsimî Hidir Demîrî zî ard vîrî ke nê çalakîye winasîyî newe nîyê. Demîrî wina qisey kerd: “Grevê vêşanîye naye ra ver zî ameyî kerdene. Seba ke şar bêveng mend û bi hemdê xo wayîr nêvejîya, xeylî kesî merdî. Na bêvengîye wina dewam nêkena. Ma wazenê, hîna ke zaf kes nêmerdo talebî bêrê qebulkerdene. Çunke nê talebî talebê heqdarî yê. Talebî ke nêrê qebulkerdene, tehamûlê şarî nêmaneno. Çunke tehamûl zî heta cayêk o. Ganî Tirkîya goreyê qanûnanê xo tê bigêro û na bêedaletîye mabên ra wedarno.“

NÊ WELATÎ DE CENAZEYÎ ZÎ YENÊ TECRÎDKERDENE

Îdarekarê Partîya Sosyalîste ya Bindestan Metîn Kiliçî zî va xoverdayoxî çalakîyanê xo de heqdar ê û wina dewam kerd: “Bi seyan merdimî, seba ke tecrîdê Îmralîyî bêro wedaritene kewtê grevê vêşanîye. Zulkuf Gezen vera tecrîdî bi çalakîya fedaîyîye merd û cenazeya ci zî hetê polîsan ra ameya remnayene. Na barbarîye ya. Ez şermezar kena. No welat de cenazeyî zî yenê tecrîdkerdene. Ganî şar nê polîtîkayan qebûl nêkero û warizo payan ser.“

GANÎ MA VENGÊ XO BIKÊ BERZ

Temsîlkarê Partîzanî Riza Bulutî zî qiseykerdişê xo de wina va: “Ma vera nê polîtîkayan de vengê xo pêt nêvet û na zî kêmasîya ma ya. Çîyo ke ma teber de nêkerdo, ê yê hepisxaneyan kenê. Ganî ma vengê xo bikê berz û ci rê wayîr bivejîyê. Ganî tek rojdemê ma grevê vêşanîye bê.“