Wekîlê YNKyî Zikrî Zêbarîyî derheqê hêrişanê îşxalî yê dewleta tirke yê vera Başûrê Kurdîstanî de ANFyî rê qisey kerd.

Wekîlê YNKyî Zikrî Zêbarîyî bale ante ser ke Başûr de şorişger, welatperwer û asayîşê herême yenê hedefkerdene û vat: ''Ez vînena ke halê Başûrî hetê asayîşî ra hol nîyo. Pêro xetê sînorî, qeza û şaristanî binê tehlukeyê îşxalî de yê. Merdimê şorişgêr û welatperwerî hetê îşxaljeran ra yenê hedefkerdene. Ganî Başûr asayîşê xo, bi sereyê xo bikero. Îşxalkerî çar hetan ra bi bahaneya PKKyî hêrişê Kurdîstanî kenê û armancê înan çinkerdişê nasnameyê kurdan o. A raşte dewleta tirke wazena ke serrgêra 100. ya Peymana Lozanî de 2023 de xeyalanê xo bîyara ca.''

Zikrî Zêbarîyî da zanayene ke Dewleta tirke wazena pêro Rojawanî îşxal bikera û vat: ''Rojawan bi gonîya ciwananê kurdan ame azadkerdene. Dişmenî Rojawan de estbîyayîşê kurdan qebul nêkerd. Erdoganî Efrîn îşxal kerd û nika zî wazeno pêro Rojawanî îşxal bikero. Vakur de HDPyî weçînayîşan de 80 kursîyî girewtî la dewleta tirke reyna estbîyayîşê kurdan qebul nêkerd û hêrişê şaredaranê HDPyî kerd. Wekîlê HDPyî û hemserek Selahattîn Demîrtaş ameyî tepiştene. Raştîye zelal a; nê hêrişî bi temamî vera nasnameyê neteweyî yê kurdan ê.''

Zêbarîyî vera hemkarîya dewleta tirke-PDKyî nêrazîbîyayîşê xo mojna û vat: ''Partîyêka kurdan a ke dişmen de têkilîye kena, her çî ra ver zerar dana xo û neteweya kurdan. Dewleta tirke wextê hêrişanê DAÎŞî de paştî dabi DAÎŞî. Welatêk çin o ke dostê kurdan bibo. Başûr de îqtîdaro sîyasî mîyanê tehlukeyêkê pîlî de yo. Wa şarê kurdî bizano ke dişmen pê planê xo yê neweyî wazeno kurdan çin bikero. Coka ganî PDK qetî dewleta tirke de pê nêkero. Eqsê ci ganî PDK pêro hêzanê Kurdîstanî reyde têbigêro û seba pawitişê Kurdîstanî xîret bikero. Ez venga pêro partî û hêzanê kurdan dana ke bêrê xo ser, bi mesuldarî têbigêrê. Meverdê yew partîye zî goreyê menfaatanê xo têbigêro. Wa her kes bi zelalî vera îşxalî tewirê xo bimojno. Ganî ma rûmetê kurdan bipawê.''