Endama Têgêrayîşê Azadîya Cinîyan ê Êzidîyan (TAJÊ) Zehrê Şemo qala fermanê 2014î kerde û da zanayene ke wextê hêrişanê DAÎŞî de hêzanê PDK û Iraqî cade Şingal war verdayî.

Zehrê Şemo eşkera kerd ke PDK, Tirkîya û hukmatê Iraqî 4 mengî yo înan rê semedê Peymana Şingalî gefan wanenê û vat: ''Ê ma rê vanê çekanê xo verdê. Ma çekanê xo verdê ma do se bikerê? Eke ma çekanê xo verdê şima reyna do ma bikişê, keyeyanê ma bivêşnê. Ma do qetî qebul nêkerê.''

Dayîke Zehrê bale ante Peymana Bexdad-Hewlêrî ya serê Şingalî û vat: ''Ma peymanêka ke bêdestûr û rizaya komelê êzidîyan ameya îmzakerdene qetî qebul nêkenê.  Ganî Papa, Mesûd Barzanî û Erdogan êzidîyan ra uzrê xo biwazê. Cinîyê êzidîyî fermanêkê bînî nêweazenê. Ewro dezgeh û sazgehê ma estê, YBŞ esto. Cinîyê êzidîyî pêro waran de aktîf ê.''

Zehrê Şemo vist vîrî ke xeyma xoverdayîşî ya Asayîşê Êzidxanî dewam kena û qaşo Iraqî 1ê nîsane de mudaxeleyê Şingalî bikerdêne. Dayîke Zehrê vat: ''1ê nîsane de hêzê ma, asayîşê ma, hemwelatîyê ma weriştî payan ser. Ê vera nê xoverdayîşî bêveng mendî. Vizêr zî înan (Nêçîrvan Barzanî û Mistefa Kazimî) reyna pêvînayîş kerdo. Her roje wina Şingalî ser o planan kenê. Şingalijî hînî eşkenê xo bipawê, îdare bikerê. Eke ma çekê xo war biverdêne înan do peynî de bivatêne ke 'dînê xo zî war verdê.' Ma sereyê xo zî danê la ma dînê xo nêdanê. Nika ê tay noqtayan de ameyî ca bîyî û nêverdenê şar şoro nêweşxane zî. Eke ma waştişê înan qebul bikerê ma gênê binê ablûqa û hînî asayîşê ma zî çin kenê. ''

Dayîke Zehrê derheqê vatişê 'PKK Şingal de yo' de qisey kerd û vat: ''Şingal de PKK çin o. Hêzê ma YBŞ, YJŞ û Asayîşê Êzidxanî estê. Ma çewî ra nêtersenê, ma raştîye vanê. Hêzê ma ma rê bes ê.''

Dayîke Zehrê peynî de wina veng da: ''Wa pêro êzidîyî wayîrê bawerîya xo vejîyê, rûmet û namusê xo vejîyê. Wa seba tay menfatan, pereyan nêkewê peyê kesêkî. Nika ma hê Şingal de xo ver danê wa ê zî wayîrê Şingalî vejîyê. Heta ke ma weş bibê ma deyndarê Rayber Apoyî yê. Ewro PKK Şingal de nîyo la ma fikrê Rayber Apoyî û PKKyî Şingal de pawenê.''