Esîrêkê bi sebebê asayîşê xo nameyê xo nêda bi mektûbêkê resna teberî, qala îşkenceyê zîndananê PDKyî kerde.

Esîrêko  di serrî û nêm o zîndan de yeno tepiştene da zanayene ke tepişteyî şertanê zaf zehmeten de yenê tepiştene û qet îmkanê tedawîkerdişî çîn o. Esîrî vat  konsolosxaneyê tirkî ra selahîyetdarî yenê tepişteyan reyde pêvînayîş kenê. Tepişteyan rê zext yeno kerdene ke cezaya xo Tirkîya de biancê.

Esîrê ke mektûbê xo resna teberî, derheqê 10 tepişteyan de zanayîş dano. Goreyê zanayîşanê mektûbî 8 tepişteyê ke Duhok de sey esîran yenê tepiştene raştê îşkenceyê giranî yenê. Esîran ra yew rixmo ke cezaya xo ya 6 mengan ante, dima yewna dosya ra cezaya 8 serran dîyaye ci. Tepişteyo bîn o ke 5 serrî yo zîndan de yo hucreyêka tenge de maneno ke tîje nêgena, zimistan serd û hamnan germin a. Qet îmkanê tedawî û resnayîşî yê nê esîrî çîn ê. Bi temamî mergî rê ameyo caverdayene. Pîya bi nê esîrî rewşa esîrêkê bînî zî zaf xirab a.

Goreyê zanayîşanê mektûbî demê peyênî de tay esîrî şawîyenê blokanê cîyayan ê ke çeteyê DAÎŞî tede yenê tepiştene.

Mektûb de ame vatene ke îşkence û şerê psîkolojîk o ke asayîş û zîndananê nimiteyan de yeno caardene sey îşkenceyê Tirkîya yê serranê 80 û 90yan o û derheqê zîyaretê selahîyetdaranê Konsoloxaneyê Erbilî yê Tirkya de zî zanayîş ame dayene.

Esîrî ard ziwan ke bitaybetî badê zîyaretê Wezîrê Karanê Teberî yê Tirkî Hakan Fîdanî konsoloxaneyê Tirkî ra selahîyetdarî înan zîyaret kenê û vat înan pêvînayîş de waştişê selahîyetdaran red kerdî.