Endamê Parastinî yê verênî Şêrwan Seîd Yusuf Hecîyî ANFyî rê qalê îşkence, bertîl û bêusulîyanê zîndananê PDKyî kerd.

Hecîyo ke 11,5 serran zîndananê PDKyî de tepişîyayo da zanayene ke keyeyê ci nêzdîyê keyeyê Barzanîyan bîyo û o wextê prosesê Aşbetalî de Îran de dadîya xo ra bîyo. Hecîyî pare kerd ke 1991 de dest pê pêşmergetîye kerdo û şeş serran sey pêşmergeyî şer kerdo. Hecîyî vat: ''Mi 8 serrî zî mîyanê Parastinî de wezîfe kerd. 2005 de ez Parastinî ra vejîyaya. 2008 de şewêke hêzanê PDKyî eşt keyeyê mi ser û ez tepişîyaya. Xora kam PDKyî rexne keno bi sûcdarîya hetkarîya PKKyî yan zî hetkarîya YNKyî tepişîyeno. Ez ameya berdene bi cayê Parastinî Zîndanê Mesîfî. Lajê Mesûd Barzanîyî Veysîyî tewreyêk da sereyê mi ro. Uca de qasê di mengan û 8 rojan mi îşkence dî. Dima çimeyê mi ameyî qefilnayene û ez erşawîyaya cayêkê bînî. Nê cayî de Veysî Barzanî, Sîdad Barzanîyî, Berwan Barzanîyî, Nezat Halî Dolamerî û Misto Sametî 'îfadeyê' mi girewt. Înan vat ke eke fermanê Kusret Resulî înan rê nêvaja ê do tecawuzê cinîya mi bikerê.

Dima ez ameya berdene bi Zîndanê Sipîlkî yê herêma Barzanî. 6 serran ez uca de, hucreyê yewkesî de tepişîya. Ceyran û awe çin bîyî, nan nêdîyayêne. ê zîndanî de îşkenceyê xidarî est bîyî. Bi desan merdimî îşkenceyê Sipîlkî ra merdî. Îşkenceyan ra mi dest pê rojeyê mergî kerd. Di heyetê Barzanîyî ameyî û înan kerd ke ez rojeyê mergî nêkera. La mi fek vera nêda. 33 rojan ra dima ez vera dîyaya ke o çax 48 kîlo bîya. Mesrûr Barzanîyî babîyê mi rê telefon kerdo û vato ke eke ez şora hetê YNKyî ê do mi bikişê.

2017 de ez ancî tepişîya û heta 2022yî destê înan de menda. Wexto ke vera dîya zî Parastinî ez û keyeyê mi şawit Îstanbulî. 6 mengan ez Îstanbul de binê çimdarîya MÎTî de menda. O çax Barzanîyan dest na pêro malanê mi ser. Ez Tirkîya ra remaya û ancî ameya Başûrî. Yew hêzê asayîşê PDKyî yo raşt çin o. Asayîşê Pêroyîyî de tim bertîl yeno dayene. Zîndanê Hewlêrî de vcergê DAÎŞî bi bertîlan vera dîyayêne.''

Hecîyî vist vîrî ke rojnameger Serdeşt Osman 2010 de bi fermanê Mesrûr Barzanîyî ameyo qetilkerdene û vat: ''Osmanî seba ke keyeyê Barzanîyan û PDK rexne kerdbi kişîya. Cenazaya ey Mûsil de ameye dîyene. Mîyanê PDKyî de îşkence çîyêko normal o. Parastinî tim tepişteyan ra bi ceyranî îşkence kerdêne. 60 metrekareyan de 167 kesî tepişîyayêne. Ez zaf bîya şahîdê nê îşkenceyan.''