Fermandarê Qerargehê Merkezê Pawitişî yê YJA-Starî Zozane Çewlîk ANFyî rê têkoşînê gerîlayan ê 2024î ercna.

Qiseykerdişê Zozane Çewlîk ra noqtayê girîngî wina yê:

''2024 de Rayber Apoyî Îmrali de ancî têkoşîn û xoverdayîşêko xurt kerd. Azadîya Rayber Apoyî armancê têkoşînê ma yo. Nê esasî ser o 2024 de çarçewa Hemleya Azadîye de vera tecrîdî şarê ma û têgêrayîşê ma xo ver da. Netîceya nê xoverdayîşî de 23yê teşrîna verêne de Rayber Apoyî de pêvînayîş ame kerdene. Rayber Apoyî pêvînayîş de vat ke tecrîd dewam keno. Hetê bînî ra bi fekê Bahçelîyî dewlete tayê eşkerayîy dayî. La nê eşkerayîyî samîmî nîyê. Çunke dewlete seba çareserîye gamêka cesure nêeşte. Rayber Apo seba ma û şarê ma îrade yo. Seba azadîya Rayber Apoyî ganî 2025 de têkoşînêko hîna xurt hetê cinîyan û şarê ma ra bêro kerdene. 2025 de hedefê YJA-Starî no yo ke bingeyê azadîya Rayber Apoyî de asta tewr berze de têkoşîn bikero.

Şerêkê dergî ra dima rejîmê Sûrîye rijîya. Tirkîya zî cade bi çeteyanê SMOyî dest pê hêrişan kerd. Dewleta tirke ha kena ke Rojawan de îşxalê xo hîra bikera û verê xo bida Mûsilî. Coka xeta Minbicî kerda hedef. Ma ancî dî ke Rayber Apo şensê şaran o. Paradîgmaya ey îlham a. Ewrp Qereqoxaz de bi nê ruhî xoverdayîş yeno kerdene. Dewleta tirke çendek hêriş bikera zî do bi kurdan nêeşka. Kurdê ke wayîrê paradîgmaya Rayber Apoyî yê sey verî nîyê. Ganî şarê Rojawanî bingeyê Şerê Şarî yê Şorişgêrî de têkoşîn pîlêr bikero. 2025 de komplo û planê seba qirkerdişê kurdan bi temamî çin bibê.

Cinîyan 2024 de bi felsefya Jin, Jiyan, Azadî morê xo da binê têkoşînî ro. Xora eke cinîyî bin bikewê komel do bin bikewo. Nê Şerê Dinya yê Hîrêyînî de rolê pîlî kewenê milê cinîyan ser. Cinîyî ganî tehlukeyanê muxtemelan bivînê û goreyê ney têbigêrê. Ganî cinîyî bingeyê xopawitişî de wayîrê destkewteyanê xo vejîyê. Sey YJA-Starî ma do sey verî cinîyan teyna meverdê û rayîr nêdê ke cinîyî bibê qurbanê dewlet, dîn û îqtîdaran.

YJA-Starî 2024 de Vakurê Kurdîstanî ra heta Herêmanê Pawitişî yê Medya têkoşînêko xurt kerd. Dewleta tirke vatêne qey emser do gerîlayan kilîd bikera. La ver bi binkewtişî şîye. Gerîlayanê YJA-Starî 2024 de hemleyê serkewteyî kerdî û derbê giranî dayî dişmenî ro. Bi taybetî çalakîya TUSAŞî moral û hêz da gerîlayanê ma.YJA-Star wayîrê mîsyonan o. 2025 de zî YJA-Star qerardar o ke azadîya Rayber Apoyî bîyaro ca û pêro cinîyan bipawê.

Çalakîkeranê TUSAŞî ra embaza ma Asya mojna ke xeta cinîya azade çendek girîng a. Coka çalakîya TUSAŞî hendê girîng a. Embazanê ma Asya û Rojgêrî paytextê ci de derbêka girane da dewleta qikere. Ma sey cinîyan bi wird embazanê xo zî sereberz ê. Tewirê embazanê ma Asya û Rojgerî seba ma zî vengdayîşê têkoşînî yo. Ma do sey YJA-Starî layîqê înan bibê. Bi na wesîle ez venga pêro cinîyan û ciwanan dana ke verê xo bidê refanê gerîlayan.

Ma wayîrê ê îmkanan ê ke 2025 bikerê serra serkewtişî, komployî tarûmar bikerê û azadîya Rayber Apoyî bîyarê ca. Ma qerardar ê ke 2025 de bi têkoşînê xo Kurdîstanî azad bijerê. 2025 de ganî her ca bêro kerdene warê têkoşînî. Bi taybetî Rojawan de ganî ma têkoşînî bivisnê asta tewr berze. Cinîyî wa 2025 de yewîya xo bîyarê ca û wurzê payan ser. Ma venga pêro cinîyan danê ke tewrê cepheyê têkoşînî bibê. Ma do xopawitiş û rêxistinîye aver berê, Rayberê xo û Rojhelatê Mîyanênî azad bikerê. Ez serrneweyê her kesî fîraz kena, şehîdanê ma yad kena û her kesî rê serkewtiş wazena.''