Zulkuf Palo: Swêd morê terorî ke dayo PKKyî ro gerek wedaro

Fermandaranê HPGyî ra Zulkuf Paloyî vat: ''Gerek heme kurdê ke Swêd de semedê  roşnkerdişê cînayetê Palmeyî murcat bikerê. Swêdî 34 serrî verê cu bîlasemed morê terorî da PKKyî ro. Gerek naye wedaro û seba ke welatê Ewropa zî wedarê xîret bikero.''

Fermandaranê HPGyî ra Zulkuf Paloyo ke xeylêk wext Swêd de tepişte mend, ANFyî rê derheqê cînayetê Palmeyî qisey kerd.

Paloyî vist vîrî ke Olof Palme seba ke kesêko demokratbi welatê xo de zî hetê qismêkî ra nêameyêne heskerdene û vat: ''Palme tek rayberê rojawanî bi ke Rayberê Kuba ya ke raştê ambargoya mîyanneteweyî ameyêne, Fîdel Castro zîyaret kerd. Palme Rojhelatê Mîyanênî, Afrîka, Rojhelatê Ewropa û Sovyetan de ameyêne heskerdene. Qedîyayîşê şerê Îran-Iraqî de rolê ci esto. Tewirê ci vera atom, çekanê nukleer bi. Şaranê bindestan, welatanê peydmendeyan, tay welatanê demokratan waştêne ke Palme bibo sekreterê pêroyî yê Yewîya Neteweyîye. Semedê naye amdakarîye estbî. Amerîka Palmeyî ra hesnêkerdene coka çirey dawetê welatê xo zî nêkerd. Mîyanê artêşa Swêd de kesê faşîstî estbî ke mergê Palme de engişta înan zî esta.

Tam dewro winayên de tay hêzê mîyanneteweyî waştêne ke PKKyî xirab ramojnê.  Seba ke PKK rixmê heme herêşan PKK aver şiyêne bi vatişê terorî ameyêne waştene ke vernîya ci bêro girewtene. Înan ke cînayet organîze kerd hem waştêne Palme ra hem zî PKKyî ra bixelîsê. Coka Palme kişt û eşt PKKyî ser. Na babete de Almanya zî tewr tay hendê Swêd berpirsîyar a. Badê derbeya 1980î masaya Tirkîya ya NATOyî dewrê Almanya bîye. Almanya zî tewr tay hendê Tirkîya vera PKK û kurdan gelç vet ke hema zî dewam kena.  Tirkîya, NATO, Amerîka heme pîya vera PKKyî têgêrayêne. Halbûkî eke o wext PKKyî lîsteyê merdişê rayberanê dinya bikerdêne zî Palme o lîsteyî de ca nêgirewtêne. Palme kesêko demokrat û dostê kurdan bi.

Welatperwerê kurdan bi  serran nêeşkayî waranê xo ra vejî. Her roje şîyêne îmza dayêne polîsan.  Keyeyê înan de cîhazê goştarîkerdişî ameyêne cakerdene. Her çîyê înan binê kontrolî de bi.  Kurdî mîyanê komelê Swêdî sey qetilkarê Palmeyî ameyênî dîyenê.  Qet çew/e goştarîya PKKyî nêkerdêne. Înan pêro pîya qeraro hempar girewtbi ke cînayetî kenê milê PKKyî. Nika 34 serrî ravêrtî Serdozgerîya Swêdî vana cînayetê Palmeyî PKKyî nêkerdo. Gerek derheqê naye de detayan bidê vajê no cînayet senî bîyo, kam kerdo, qey kurdî sey sûdar ameyî ramojnayene. Welatperwerê ke o wext ameyî tepiştene gerek mexdurîyetê înan bêro wedaritene.  Reyna çîyêko muhîm zî tîya têgêrayîşêko sîyasî sey PKKyî esto.  Têgêrayîşê ke azadîye.  No têgêrayîş 34 serrî sey terorîst ame ramojnayene, hetê Swêdî ra bi mexdûr. Dewleta Swêdî gerek ziraro ke dayo PKKyî telafî bikero. Êfu waştiş çîyo şeniko.  Gerek nizdîbîyayîşo xelet ê vera PKKyî bêro bedilnayene.Swêd belka nêeşkeno nê fehmê xeletî yê vera PKKyî werte wedaro la tewr tay eşkena tay gaman bierzo.

* Swêd tewr tay gerek sanika ''PKK rêxistina terorî ya'' caverd. 34 serrî verê cu bîlasemed morê terorî da PKKyî ro. Gerek naye wedaro û seba ke welatê Ewropa zî wedarê xîret bikero.

* Swêd gerek PKK, paştgêranê PKKyî û kurdan ra ozrê xo biwazo.

* Tay hetê  ke xo ra vanê kurdî înan zî no cînayet eştenê PKKyî ser. Ê zî gerek ozrê xo biwazê û hesabê naye bidê.

PKK û kurdî do peynîya naye cameverdê. Têna vatişê ma PKK no nêkerdo nêvejeno. Swêd xo sey dewleta huqûqî ramojnena. Gerek heme kurdê ke Swêd de yê wayîrê heqanê xo vejîye, muracatê hukmî bikerê ke prosesê cînayetê Palme reyna bêro destpêkerdene. Swêd gerek na dewa roşn bikero, mexdûrîyetê kurdan û PKKyî werte ra wedaro. Gerek no cînayet bêro roşnkerdene. No vera Palmeyî zî wezîfeyê ma yo.''