29ê teşrîna peyêne de hêrişanê dewleta tirke û cerganê ci ra Şehba û Til Rifet de cuya 200 hezar merdimî kewtî binê tehlukeyî. Bira Meclîsê Kantonê Efrîn-Şehba ra dima 121 kesî Kantonê Efrîn-Şehba ra bi asayî derbazê waranê Îdareyê Xoserî bîyê. Hemserekê Dayîreyê Karanê Koçberan ê Îdareyê Xoserî Şêxmûs Ehmedî derheqê babete de ajansê ma rê qisey kerd.

Ehmedî îfade kerd ke Neteweyê Yewbîyayeyî (NY) û dezgehê bînî ganî destek bidê koçberan û vat: ''Ganî no destek teyna madî nêbo; ganî NY û dezgehî vera hêrişanê dewleta tirke û cergan tewir bimojnê û îşxalkeran muhakeme bikerê.''

Ehmedî da zanayene ke şar neçare mendo ke koç bikero û vat: ''Şar ame tehlîyekerdene ke şoro waranê asayîyan. Pêro dezgeh û rêxistinanê Îdareyê Xoserî seferberîye îlan kerde, masaya krîzî ronîyaye. Tebqa û Reqa de seba pêşwazîkerdişê koçberan di merkezî ronîyayî. 

Cakerdişê koçberan xora zehmet bi. Ma xeymî akerdî, dibistanan de şar cakerd, stadyum û camîyan de cakerdene. La ganî şertê mendeyî zî bêrê peydakerdene. Ganî cinî û domanî xizmetê weşîye bigêrê. Ganî koçberî bi hawayêkê rêxistinkerdeyî bêrê pêşwazîkerdene û cakerdene. Teyna Îdareyo Xoser ney ganî şarê ma zî nê xebatan bikero. Ganî qet yew koçber/e werte de nêmano/a.''

Ehmedî vist vîrî ke 25 hezar keyeyî yanî 121 hezar kesî Kantonê Efrîn-Şehba ra bi asayî ameyê cakerdene û vat: ''Zafê koçberan Tebqa de yê. Dima Reqa, Kantonê Cizîre û Kobanê de koçberî est ê. Şarê ma zî keyeyê xo de koçberan keno meyman. Ma şarê xo rê zî sipas kenê.''

Ehmedî da zaneyene ke koçberî zafêr kurd ê la mîyanê înan de tirkmen û erebî zî est ê. Ehmedî vat: ''Zaf koçberî est ê ke îmkanê Îdareyê Xoserî bi înan nêeşkenê. Coka şert o ke dezgeh û rêxistinê mîyanneteweyîyî destek bidê ma. Ganî NY û dezgehê bînî destek bidê herême. Ganî no destek teyna madî nêbo; ganî NY û dezgehî vera hêrişanê dewleta tirke û cergan tewir bimojnê û îşxalkeran muhakeme bikerê.''