13ê teşrîna peyêne ya 1960î qezaya Amûdê ya Qamişloyî de 500 domanê kurdî seba ke fîlmê “Cerîmet Nisif el-Leyl'' temaşe bikerê Sînemaya Şehrazadî ya Amûdê de ameyî pêserkerdene. La dima ke fîlmî dest pêkewr adir kewt perdeya sînema û dima adir vilayê sînema bi. Şewat de 283 domanan dinyaya xo bedilnaye. Derheqê serebûtî de tehqîqat zî nêame akerdene. Rejîmê Baasî vat 'qeder o.' La wextê şewatî de erkdar û teknîsyenan rê çîyêk nêbi, leşkeran mudaxele nêkerd û berî kilîdkerde bîyî.

Baxçeyê Pakrewanî cayê salona sînema ser o ronîya û tede fotografê Mihemedê Seîd Axayê Deqorî est o ke wextê qirkerdişî de xeylêk domanî şewatî ra xelisnabî. Baxçe de birêkê awe zî est o ke bi desan domanî kewtbî tede. Şewatî ra nata hema zî Amûdê de salona sînema çin a.

283 domanî hetê Îdareyê Xoserî yê Rojawanî ra sey şehîdanê şorişî ameyî îlankerdene.

Mihemed Emîn Ebdulselamo ke şahîdanê qirkerdişî ra yo û o çax 12 serre bîyo şewatî ra xelisîyayo. Abdulselamî wina qala serebûtî kerd: ''Salona sînema qij û teng bîye. Tay domanî zî erdî de roniştbî. Nêm saete ra dima nişka ra pey ra vengêk ame. Domanêkî xo eşt war. Ma xo zivirna pey û dî ke motor vêşeno. Ma mat mendî. Domanan xîret kerd ke vejîyê teber la berî kilîdkerde bîyî. Ez dikana zereyê sînema ra remaya. Situnê sînema zî kewtî, serban kewt. Birêkê awe est bi, tay domanan xo eşt zereyê ci. Wexto ke ez vejîya teber hişê mi şi. Pêro şarê Amûdê verê sînema de kom bibi. Qîrayîşê dadî û babîyan est bi.

O şewat afatêko xozayî nêbi. Eke ê 283 domanî bixelisîyayêne nika tornê îna est bibîyêne. Derheqê şewatî de tehqîqat zî nêame kerdene. Xora tedaya dewleta Sûrîye zaf bîye. Dewlete çalakîya kurdan a qije zî qebul nêkerdêne. Bi nê hawayî sereyê serebûtî ame girewtene.''