Dewê Bicqase, Kilote, Gundê Mezin û Başemrê yê qezaya Şêrawa ya Efrînî  yê ke xeta sînorî ya herêma ke hetê dewleta Tirkî û çeteyanê ci ra ameya îşxalkerdene de yê, hîrê hetan ra hetê artêşa Tirkî û çeteyanê ci ra binê çemberî de yê. Dewijanê nê dewan ANF’yî rê qisey kerd.

'Ma Do Heta Peynî Xover Bidê'

Mahmûd Mihemedo ke endamê Meclîsê Şêrawa û heman wextî de komîteya sûlhî ya çar dewan de ca geno vist vîrî ke dewa Bircqasê dewêka kahan a û nê vatî: ’’Dewe sinorê dewanê ke dewleta Tirkî îşxal kerdî de ya. Nizdê 150 Efrînijî dewa Bircqasê de manenê. Reyna dewanê bînan ê ke binê çember de yê nê dewan de zî Efrînijî estî. Ma binê çember de yê. Mabênê ma û dewleta Tirkî de tayî cayî 1 kîlometre mesafe esto. Havan erzîyenê, rayîrê ma hete rejîmî ra yenê qefilnayene. Ma tîya xover danê, ma do hete peynî xover bidê.’’

'Tengayîya Tewr Pîle Ma Rejîmî Ra Ancenê'

Mihemmed Elî Mihemmedo ke badê îşxalê Efrînî dewa Birqasê de ciwîyeno ard ziwan ke tengayîya tewr pîle semedê înan qefilnayîşê rayîrê Nubil-Zera yo ke binê kontrolê rejîmê Sûrîye de yo û va: ‘’ Ma nizdê 225 Efrînijî nê dewan de manenê. Hîrê hetê ma hetê artêşa Tirkî û çeteyanê ci ra girewteyê. Ma ser o hawanan varnenê. Tena rayeyêkê ma ekerde yo, o zî binê kontrolê rejîmê Sûrîye de yo. Rejîm tim rayîrî qefilneno. Ma ra wesayîtanê ma genê û pere wezenê.  Hêrişan de kesê ke benê birîndar bisebebo ke rayîr qefilnayeyo ma nêeşkenê biresnê nêweşxaneyan. Gama ke rayîr yeno qefilnayene ma zordarîya pîle ancenê.’’ 

'Rejîm Elekrîk Nê Çar Dewan Nêdano'

Hemserekê Komînê dewa Kilotê Hisên Elî zî vat: ‘’ Rejîm elekrîk dayo Nubil- Zehra la  a nê çar dewan nêda.  Şarê dewe tengayîya pîle anceno.  Kar çîn o, erazîya citkarî nêmenda.  Derûdorê dewe de mayînî ameyî cakerdene. Şar nêeşkeno bikewo erazîya xo.  Reyna her roje hawanî yenê eştene. Bi nê hêrişan wazenê ke ma erdê ma ra bikerê la ma do rixmê hême hêrişan çi rey dewanê xo canêverdê.’’

'Ma Do Rixmê Heme Hêrişan Dewanê Xo Canêverdê'

Dewa Kilote ra Fatma Îbrahîme zî  ard ziwan ke darê zeytunî û erazî yê ke şar pê îdareyê xo keno ameyî vêşnayene la ê do dewa xo ra mevejê.

Hemsereka Komînê dewa Mezinî Emîne Hesen Berho zî ard ziwan ke ê tim raştê hêrişê çeteyan yenê û rîyê ambargoyê rejîmî ra zehmetîye ancenê û va: ‘’Di mengî yo ma nêeşkenê ravêrê hetê bînî yê Şêrawa. Rejîm rayîr girewto û destûr nêdano.  Rejîm ma yewbînan ra raqilneno. Her hêrişî de ma keyeyanê xo ra vejîyenê.  Gama ke ma vejîyenê grûbê rejîmî yenê keyeyanê ma kenê talan.''

Hemserekê Komînê dewa Başemrê ya ke çeteyan ra zaf nêzdî ya, Zekerî Mihemmed Xîrfanî zî  vat rojane topê hawanî yenê eştene û rixmê nêweş û birîndaran zî ê ge-ge bi mengan dewe de mahsûr manenê.