Operasyonê Hêzanê Surîyeya Demokratîke (QSD) Baxozê bajarekê Hecînî yê Dêra Zorî de dewam keno. Şerwananê QSD'yî 9'ê Sibate dest bi tehlîyekerdişê çeteyanê DAÎŞ'î yê ke qebûl kenê ke teslîm bibê û keyeyanê înan kerd. Netîceyê xebatê tehlîyekerdişî yo ke heta 1'ê Adare dewam kerd, 10 hezar ra zêde kesî ver bi herêmanê biasayîşan ameyî neqlkerdene.

Dimayê tehlîyekerdişê 20 rojan, nêzdîyê 2 hezar çeteyê DAÎŞ'î yê ke zafêrîya ci xerîb ê û keyeyanê înan red kerd ke teslîm bibê. Naye ser o, hêzanê QSD'yî 1'ê Adare saete 18:00 dest bi operasyonê vera çeteyanê ke Baxoz de mendê kerd. Dimayê operasyonê panc rojan o ke hîrê hetan ra yeno kerdene, vizêr bi seyan çeteyê DAÎŞ’î bi keyeyanê xo teslîmê şerwananê QSD’yî bîyî.

600 ra zêdeyî çeteyanê DAÎŞ'î û keyeyê înan korîdorê biasayîşî yê şerwanan ra xo resna girê Baxozî. Kameramananê ANF'yî dîmenê înan antî. Çeteyê ke zafêrîya ci komaranê Tirkî ra yê, ANF’yî rê qisey kerd û qalê tewrbîyayîşê xo kerd. Zafêrîya çeteyan Tirkmenîstan, Ozbekîstan û Kazakîstan ra yê. Hemeyê înan vat, “Ma Tirkîya ser o ameyî Surîye, ma reyna wazenê agêrê Tirkîya.”

Çeteyê DAÎŞ'î yo bi nameyê Mustafa Tirkmenîstanî ard ziwan ke o Tirkmenîstan ra ameyo Tirkîya, wextêk Tirkîya de mendo, uca de ci ra vato “Sûrîye de pere esto, mal û milk her çî esto” naye ser o zî derbazê Sûrîye bîyo, la seba ke ameyo poşman bîyo. Çeteyê DAÎŞ'î îdîa kerd ke mîyanê DAÎŞ'î de ey çeke nêgirewta xo dest û bazirganîye reyde eleqedar bîyo û vat, Tirkmenîstan de zulm dîyo coka Tirkmenîstan ra vejîyayo. Ma ci ra persayî ke naye ra dima o wazeno ke se bikero; çeteyo bi nameyê Mustafayî zî vat, o wazeno biagêro Tirkîya.

Çeteyo bi nameyê Mîradîl zî ard ziwan ke o teba apê xo serê serra 2016 de ameyê Tirkîya, bado zî derbazê Iraqî bîyo û îdîa kerd ke o bazirganîye reyde eleqedar bîyo, çeke nêgirewta xo dest û dewamê ci de vat, “Seba ke ma Tirkmenîstan de zaf zulm dî ma ameyî Tirkîya. Uca de zî cuye zaf vaye bîye. Tirkmenîstan ra yew o ke ma nas kenê, ma ra vat ke Sûrîye de ma do bibê wayîrê mal û milkî. Ma zî keyeyê reyde ameyî. Seba ke ameya poşman a. Maye û pîyê mi zî grûba verêne reyde vejîyayî û nika kampe de yê. Ma wazenê biagêrê Tirkîya.”

Çeteyê DAÎŞ'î yo bi nameyê Ebû Mûhammed zî sey yê bînan ard ziwan ke serra 2016 de o ameyo herême û îdîa kerd ke bazirganîye reyde eleqedar bîyo û wazeno agêro Tirkîya. Seba persê “Çira Tirkîya?” vano, “Uca de demokrasî esto.”

Çeteyêko bîn yê DAÎŞ'î yê Tirkmenîstanî yo ke birîndar bîyo vat, “Seba ke Îslamî biciwî û domananê xo bi kulturê îslamî pîl bikerî” ameyo herême. Seba persê “Şima welatê xo de îslamî nêciwîyenî? çeteyê DAÎŞ'î vat, welatê ey de îmakanê nê çîyan çin ê.

Çeteyê DAÎŞ'î yê ke teslîmê QSD’yî bîyê heme vanê ke Tirkîya ser o derbazê Sûrîye bîyî û wazenê ke reyna agêrê Tirkîya.

Çeteyê DAÎŞ'î û û keyeyê înan ê ke teslîme QSD’yî bîyê, verê rayîrê korîdorî, wareyê şerî ra yenê vetene, tîya de dimayê kontrolî zanayîşê nasnameyê înan yenê qeydkerdene.

Şewanê QSD'yî hewcedarîyê bingeyênî yê cuye seba çeteyanê DAÎŞ’î û keyeyanê înan tedarîk kenê û înan şawenê kampan.

Herême de hetê ra xebatê tehlîyekerişî dewam kenê, hetê bînî ra zî şer qewimîyeno. Mabênê şewananê QSD'yî û çeteyanê DAÎŞ’î yê ke qebûl nêkenê teslîm bibê de şer dewam keno.