Wexto ke herêmanê Şehba û Til Rifet de hêrişê çeteyanê SMOyî dewam kerdêne rojnamegeran şahidîya şer û xoverdayîşî kerde. Rojnamegere Rûkene Efrîn xoverdayîş û serebûtî kerdî belge û bîye şahîda şer û xoverdayîşî.

Rûkene Efrîn wina qalê hêrişanê çeteyan û xoverdayîşê şar û şerwanan kerd:

''HTŞyî 27ê teşrîna peyêne de dest pê hêrişan kerd. Rejîmê Sûrîye qetî xo ver nêda û cade teslîm bi. Dima ca de Şehba çar hetan ra gêrîyaye binê ablûqaya çeteyan. 6 dewê Şehba bi giranî raştê hêrişan ameyî. HRE vera nê hêrişan xora bi xurtî cewab da. La heman wextê hêrişê çeteyan de hêrişê dewleta tirke zî dest pêkerd. Şarê Şehbayo ke Efrînî ra koç kerdbi, cara tim mîyanê xoverdayîşî de bi. Dewleta tirke hêrişanê xo reyde propagandaya reşe zî kerdêne. Mi serebûtî yew bi yewî teqîb kerdî û mi dî ke şar heta peynî waran de bi. Şarî qetî şerwanî teyna nêverdayî. 

Meclîsê Kantonê Efrîn-Şehba bire daye ke Şehba ra xo bianco. Na bire seba asayîşê şarî dîyaye. Eke şar Şehba ra nêvejîyayêne çeteyan do qirkerdişêko pîl bikerdêne. Bire 1ê kanûne de dîyaye. Wextê koçkerdişî de dîmenê dejînî vejîyayî werte. Karwan û wesayîtî rêz bibî. Çeteyan wextê koçkerdişî de zî şarî rê zulm kerdêne. Çeteyan Til Qiraxî de kerd ke kesê bi nameyê Ebdulrehman Murşîd tepişo. Murşîdî seba ke nêkewo destê xo kişt.

Ma sey koma Til Qiraxî resayî koma Fafînî. Hewa serd bi. Cinîyêka digane bîye ke rewşa ci xirab bîye. La seba ke Nêweşxaneyê Şehîde Avrîne destê çeteyan de bi, a cinîye neçare mende ke mîyanê şarî de dergûşê xo bîyaro. La dergûş şi rehme. Mîyanê kome de kesê kokimî zî şîyî rehme. 

Cinîyan vatêne ke çeteyan vera înan hêrişê cînsîyî û fîzîkîyî kerdê. Astengîyanê çeteyan ra 50 keyeyî Şehba de mendî. Nê keyeyan rê çeteyan îşkence kerd, ê remnayî û sena veradayîşî zî fîdye waşte. 

Hêvîya agêrayîşê ver bi Efrînî tim zerrrîya ma de ya. Bi xoverdayîş û paştdayîşî ma do wayîrê ameyoxî vejîyê û heta azadîye têkoşîn bikerê.''