Hetkarê Hemserekanê Îdareyê Xoserî yê Rojawanî Bedran Çîya Kurdî derheqê îxtîmalê hêrişanê Tirkîya, ablûqaya PDKyî ya vera Rojawanî, waştişanê ENKSî de ANFyî reyde qisey kerd.

Qiseykerdişê Çîya Kurdî ra beşêk wina yo:
''Pêvînayîşê ENKS û PYNKyî ra dima ENKS wazeno weçînayîşan de beşdarê Îdareyê Xoserî bibo. Ganî ENKS goreyê netîceya weçînayîşan têbigêro. La ma nika ra nêeşkenê vajê ke ENKS do beşdarê Îdareyî bibo yan nêbo.

Yeno vatene ke PDKyî pêşmergeyî sînorê Rojawanê Kurdîstanî de kom kerdî û tay qereqolan virazeno. Hetê bînî ra dewleta tirke de Dirbêsîyê de xendekan akena. Nê serebûtî dima ke Nêçîrvan Barzanîyî Anqara zîyaret kerde qewimîyayî. Wextê nê zîyaretî de Herêmanê Pawitişî yê Medya de hêrişî estbî, dewleta tirle Şingalî rê gef werdêne. Coka ma pê nê zîyaretî kewtî şik.  Mevlut Çavuşogluyî vat 'Ma têkoşînê hemparî yê vera PKKyî ser o Nêçîrvan Barzanîyî reyde pêkerd. PDKyî hema derheqê naye û hêrişanê vera Başûrê Kurdîstanî de tewirêk nêmojna. La PDKyî hêrişê dewleta tirke kerdî meşrû. No tewir û nêzdîbîyayîş xizmetê Kurdîstan û kurdan nêkeno. Beno ke tay menfaatê PDKyî estê. La ganî PDK hêverî menfaatanê kudan bipawo.

Ganî PDK vera nê kerdişan tewirê xo zelal bikero. Ganî PDK rayaumumîye rê eşkera bikero ke çira Rojawan de wina têgêreno. Ganî hêzê kurdî dişmenî reyde pênêkerê. Ameyoxê pêro parçeyanê Kurdîstanî pabesteyê yewbînan ê.

Ewro hema zî hêrişê muxtemelî yê dewleta tirke yê vera Rojawanî rojdem de yê. Ma ganî nê çîyan hesab bikerê. Dewleta tirke eke firsendêk bivîna do hêrişê Rojawanî bikera. Çunke armancê aye çinkerdişê şarê ma yo. 

Ewro Rûsya, DYA û hêzê bînî yê ke verê cû destûrê îşxalan dayê, vanê ê do nêverdê ke Tirkîya rena hêrişê Rojawanî bikera. La ma ganî pê nînan bawer nêkê û vera hêrişanê neweyan ê dewleta tirke tim amadekarîya xo ya xoverdayîş û pawitişî bikerê.

Dewleta tirke ewro vera aramî û asayîşê ma û pêro dinya  bîya tehlukeyêk. Ma verî zî wina vat le dinya na raştîye newe dîye. Nika Tirkîya seke tecrîdkerde ya. Tirkîya eke wina şora do zêdêr biba qels. 

Dîyalogê PYNK û ENKSî nika resayî astêke. Ma pêkerd ke Komîteya Berze ya Kurdan wa bêra ronayene. Ma do nê rojan de naye îlan bikerê. ENKS wazeno beşdarê Îdareyê Xoserî bibo. Goreyê ma rayîro tewr raşt ê ney weçînayîş o. La seba ke îtîfaq û yewîya kurdan zixm bibê û aver şorê ma tay babetan weçînayîşî ra verî nîqaş bikerê.

Pêvînayîşan de tay babetê sey asayîş û leşkerî mendî. Nê babetî zî xora do QSD, YPG û YPJyî reyde bêrê nîqaşkerdene. Muxatabê babete ê yê.  Ma nika pabeyê ci yê ke heyetê ENKSî Başûrê Kurdîstanî ra agêro û îlan bikero ke ê PYNKyî reyde pêkerd. Dima ma do pabeyê ci vinderê ke ê mîyanê Komîteya Berze ya Kurdan de komîteyanê xo awan bikerê.

Wezîrê Karanê Teberî Velîd Muallîmî kombîyayîşê Neteweyan ê Yewbîyayeyan de bi uslubêkê xirabinî hêrişê Îdareyê Xoserî û QSDyî kerd. Rejîmê Baasî zerar dano şaranê Sûrîye. Ganî her kes naye bivîno. Rejîmê Baasî destûr dano ke Tirkîya Sûrîye de serdest biba. Rejîmê Baasî Sûrîye parçe keno. Rejîm QSD keno hedef ke Tirkîya û cergê ci newe ra tay herêman îşxal bikera.

Oyo ke Dêra Zorê de alozîye vejeno rejîm bi xo yo. La ê QSD sûcdar kenê. Welîd Muallîmî bi xo Dêra Zorê de venga şarî da ke vera Îdareyê Xoserî sere wedaro. Bi nê hawayî rejîm kaos, alozî û fîtne keno. La şarê herême cara rejîmê Sûrîye nêwazeno. 

Mabênê rejîm û AKP-MHPyê faşîstî de hemkarîye esta. Nê hêzî pîya bi heman planî vera QSD û Îdareyê Xoserî têgêrenê. Nê wazenê pê rayîrê propagandayan QSD û Îdareyê Xoserî çin bikerê. La şarê ma pê her çi hesîyayî. Şarê herême hetê Îdareyê Xoser û QSDyî de yo.''