Îdareyê Xoserî yê Demokratîkî seba înşaya Sûrîyeya newîye beyannameyê bi 10 madeyan weşana. Beyanname verê bînaya Îdareyê Xoserî de bi eşkerayîyêka çapemenîye ame parekerdene. Hemserekanê Îdareyê Xoserî Evîne Siwêd û Hisên Osmanî beyanname wend.

Beyanname de ame parekerdene ke proseso ke rijîyayîşê Baasî ra dima dest pêkerdo ganî bi beşdarîya pêro şar û hêzan bêro rayîrberdene, pêro hêzê Sûrîye yewîya xo awan bikerê û dormeyê menfaetanê hemparan de bêrê yewca.

Eşkerayîye de wina ame vatene: ''Ma girîngîye danê hemkarîya hukmatê Şamî û Îdareyê Xoserî. Verê pêro şaranê Rojawanî de mesuldarîyê ma est ê. Coka ma nê beyannameyî eşkera kenê.

Qederê prosesî do nê gamî dîyar bikerê Ma venga pêro hêzanê Sûrîye danê ke nê xususan de bixebitê:

-Wa yewîya erdê Sûrîye bipawîya û no erd vera hêrişanê dewleta tirke ya îşxalkere û cerganê ci zî bipawîyo.

-Wa çalakîyê leşkerî vinderê û seba înşa dîyalogo neteweyî bêro kerdene.

-Pêro erj, reng û kulturê Sûrîye bê cîyakerîye wa bipawîyê.

-Şam de ni beşdarîya pêro hêzanê Sûrîye wa kombîyayîşo îstîsnayî bêro kerdene.

-Cinîyî wa bi aktîfî mîyanê prosesî de cabigêrê.

-Çimeyê Sûrîye aîdê şaranê Sûrîye yê coka ganî bi edîlane bêrê barkerdene.

-Seba agêrayîşê koçberan wa garantî bêra dayene, mîrasê kulturelî wa bipawîyê, polîtîkayê seba vurnayîşê demografî wa vinderê.

-Ma do bi hemkarîya QSD û Kaolîsyonê Mîyanneteweyîyî tim vera DAÎŞî têkoşîn bikerê.

-Îşxal wa biqedo, wa şarê Sûrîye qederê xo tayîn bikero.

-Ma venga dewletanê ereban, Koalîsyonê Mîyanneteweyîyî û pêro hêzanê mîyanneteweyîyan danê ke seba Sûrîye rolêkê aktîfî kay bikerê, paştî bidê şaranê Sûrîye la mudaxeleyê karanê zereyî yê Sûrîye mekerê.''