Îdareyê Xoserî yê Rojawanê Kurdîstanî verê bînaya Meclîsê Rayberdişî de Reqa de b, eşkerayîyêka çapemenîye deklarasyonê çareserîye wend. 

Eşkerayîye de ame vîrvistene ke kîzê zereyê Sûrîye 10 serran ra zêdeyêr o dewam keno û nê krîzî de heta nika bi hezaran kesî merdê. Eşkerayîye de dîya zanayene ke seba ke Îdareyo Xoser peyman û pêkerdişan de nêno şinasnayene meseleyê Sûrîye zî dewam kenê. Deklarasyon de nê çîyî ameyî îfadekerdene:

''-Ma yewîya Sûrîye hetî de yê. Ma amade yê ke seba çareserîyêka hempare pêro terefan, sîyasîyan de dîyalog û pêvînayîşan bikerê.

-Ganî pêro şarê Sûrîye sey unsurê esasî yê Sûrîye bêrê qebulkerdene, heqê şaran ê kolektîfî bêrê garantîkerdene, neteweya demokratîke bêra awankerdene û îdareyê herêmîyî bêrê ronayene.

-Modelê ma yê Îdareyê Xoserî û paradîgamaya komelê demokratîk, ekolojîk û azadîgîra cinîyan ganî şaranê Sûrîye rê bibê referansê çareserîye.

-Ganî pêro îmkan û zengînîyê Sûrîye mîyanê şaran de, esasê têdûştîye ser o bêrê vilakerdene. Ganî berê bazirganîye yê sey Til Koçerî bêrê akerdene. 

-Erk û mesuldarîyê pêro Sûrîye û merdimatîye yê ke vera cerganê DAÎŞî û cerganê bînan têkoşîn bikerê û paştî bidê têkoşînê ma.

-Hêrişê dewleta tirke verê verganê DAÎŞî akenê, paştî danê averşîyayîşê cergan. Îşxalê Tirkîya hînî demografîya Sûrîye vurneno, beno sebebê krîzanê mendeyan. Ma qet dişmenîya şaranê Tirkîya yan zî dişmenîya Tirkîya nêkenê. Ma do çarçewa xopawitişê meşrûyî de cewab bidê hêrişanê dewleta tirke.

-Seba ke Sûrîye de çareserîya demokratîke û haştîgîre bêra caardene ma venga pêro beşdanê û îdareyê dewleta Sûrîye danê ke çareserîyêka hempare virazê. Ma venga pêro hêzanê mîyanneteweyîyan û neteweyîyan danê ke seba çareserîye xîret bikerê. Ma amade yê ke seba çareserîye her erk û mesuldarîye bigêrê xo ser.''