Îdareyê Xoserî yê Rojawanî vera hêrişanê dewleta tirke ya îşxalkere yê serê Hêzanê Asayîşê Zereyî nêrazîbîyayîşê xo mojna û pare kerd ke dewleta tirke armanc kena ke tedbîranê înan ê Kampa Holî sabote bikera.
Dewleta tirke ya îşxalkere vizêr Kobanê de noqtayêka Hêzanê Asayîşê Zereyî dabî bombayan ver û hêriş de çar şerwanê Hêzanê Asayîşê Zereyî şehîd bibî.
Îdareyê Xoserî yê Rojawanê Kurdîstanî bi eşkerayîyêke vera hêrişî nêrazîbîyayîşê xo mojna. Îdareyê Xoserî ard ziwan ke key înan vera hucreyanê DAÎŞî Operasyonê Merdimatîye û Asayîşî dayo destpêkerdene, dewleta tirke zî dest pê hêrişê Hêzanê Asayîşê Zereyî kerdo.
Îdareyê Xoserî bale ante ser ke dewleta tirke armanc kena ke tedbîranê înan ê Kampa Holî sabote bikera, Operasyonê Merdimatîye û Asayîşî asteng bikera. Îdareyê Xoserî vat: ''Dewleta tirke bi hawayêkê zelalî û bi pêro hêzê xo paştî dana cerganê DAÎŞî. Ma venga rayaumûmîya dinya û herême danê ke verê hêrişanê dewleta tirke bigêra. Dewletê garantorî sey Rûsya mesuldarê nê hêrişan ê. Hêzê ma do tim seba ke aramî û asayîşê herême bîyarê ca.''
