Înîsîyatîfê Yewîya Demokratîke 11ê gulane de amebi ronayene. Hemvervatoxê Înîsîyatîfê Yewîya Demokratîke û Wekîlê DEM Partî yê Amedî Mehmet Kamaçî derheqê babete de ANFyî rê qisey kerd.

Kamaçî dîyar kerd ke netîceya xebatanê 11 mengan de înîsîyatîf ronîyayo û vat: ‘’Seba ke heqanê bindestan bipawo, înîsîyatîf ronîya. Înîsîyatîfê Yewîya Demokratîke sere de Vakurê Kurdîstanî de do her ca de pêro kurdan, bawerîyan û şaran rê bibo sîwanêke.

Seba kurdan babeta tewr girînge yewî ya. Meseleya yewîya neteweyî ya kurdan vurîyaya trajedîyêka se serrî. Eke hendê heqê kurdan yenê înkarkene, estbîyayîşê kurdan nêno qebulkerdene, cografyaya kurdan yeno parçekerdene sebebê ney canêardişê yewîye yo. Erkanê înîsîyatîfî ra yew awankerdişê yewîya kurdan o.’’

Kamaçî derheqê mesuldarî û erkê xo yê babeta komelkîbîyayîşê înîsîyatîfî de vat: ‘’Dima ke PKKyî xo fesh kerd babeta çareserîya demokratîke ya meseleya kurdan hîna zaf kewte milê Înîsîyatîfê Yewîya Demokratîke. Ma pê bawer ê ke do karanê hîna pîlan bikerê. Hayîya ma bi mesuldarîyanê ma est a. Ma do çareserîye bi demokrasîyî bîyarê ca.’’