Îdareyo Xoser ê Vakur û Rojhelatê Sûrîye beyanatêko nuştekî weşana û derheqê peymana mabênê QSDyî û hukmatê Sûrîye de nê çîyî pare kerdî:

"Pêkerdişo ke mabênê Fermandarîya Pêroyî ya QSDyî û artêşa Sûrîye de bi garantîya Yewîya Rûsya ame caardene, sînor û bandura Sûrîye, Dewleta Tirkan a îşxalkare ra paweno. Îdareyo Xoser û Fermandarîya Pêroyî ya QSDyî eşkera kerd ke no pêkerdiş têna seba pawitişê sînorî û bandurîya Sûrîye yo. Pêkerdişêk derheqê dezgehanê Îdareyê Xoserî û xebatanê ey de nêame viraştene. La reyna zî Îdareyo Xoser do xebatanê xo  dewam biko û her karker û her dezgeh zî do wezîfeyê xo dewam biko. Îdareyê Xoserî verê cû şarî reyde seba dîyalogî veng da û hema zî veng dano.

Fermandarîya Pêroyî ya QSDyî û Îdareyê Xoserî nermbîyayîşêk ard ca û destê xo dergê destpêkerdişê çareserîyêka rastikêne ya alozîya Sûrîye kerdî. Na çarçewa de tayê wezaretanê Şamî sey wezaretê pawitişî, zereyî û perwerdeyî, venga şexsanê herêmanê Îdareyê Xoserî da ke na rewşe teror û sucdaran zî sererast kena. Îdareyo Xoser ê Vakur û Rojhelatê Sûrîye waştişê dîyalogî û çereserîye dibare kerd. La no metodo ke vejîya meydan, xizmetê çareserîya sîyasî nêkeno. Eqsê ci alozîye keno xorîn. Îdareyê Şamî eke çareserîya alozîya Sûrîye de cidî yo, ganî eşkera biko û xîtabê xo bi hewayêkê zelalî dezgehanê Îdareyê Xoserî yê Vakur û Rojhelatê Kurdistanî rê biko.

No têna seba pawitişê yewîya Sûrîye û biratîya şaran o ke herêmanê ma de ame caardene. Îdareyo Xoser rojêke zî vera yewîya welatî û bandurîya ci nêxebitîyo. Çekê ma vera terorî bîyî. Ma destê xo dergê şaranê Sûrîye kerdibi. Her tim zî ma seba pawitişê destkewteyanê şarî têkoşînê xo bikê. Îdareyo Xoser ê Vakur û Rojhelatê Sûrîye seba dîyalogan amade yo ke bireso çareserîya sîyasî û armancê şarî yê têkoşînî bîyaro ca. Na çarçewa de hêzê xo do seba Sûrîyeya demokrate bixebitno."