Hemserekê Ofîsê Karanê Multecîyan ê Îdareyê Xoserî Şêxmûs Ehmedî derheqê rewşa multecîyan de ANFyî rê qisey kerd. 

Şêxmûs Ehmedî pare kerd ke multecîyê sûrîyeyîjî bi serran o Tirkîya de raştê nîjadperestîye yenê û Lubnan de zî rewşa multecîyanê sûrîyeyîjan wina ya. Ehmedî vist vîrî ke înan nîsana 2023yî de deklarasyonê multecîyan eşkera kerdo.

Ehmedî vat: ''Îdareyê Xoserî bi rayîrê nê deklarasyonî dîyar kerd ke destekê warê mîyanneteweyî nêro kerdene ê amade yê ke multecîyan pêşwazî bikerê. Rojanê peyênan de şerê Hîzbullahê Lubnanî û Îsraîlî ra xeylêk kesî Lubnanî ra koçê tîyayî bikerê. Ma seba nînan masaya krîzî awan kerde. Tirkîya seba multecîyan bi mîlyaran pereyî gêna la nê pereyî seba multecîyan xerc nêkena. Tirkîya nê multecîyan sey leşkeranê xo şuxilnena. Na kerdene binpaykerdişê heqanê merdiman o. Ganî Neteweyê Yewbîyayeyî (NY) û dezgehê mîyanneteweyîyî vera ney tewirê xo bimojnê. Dewleta tirke multecîyan bi zorî sînorî ra teber kena û şawena herêmanê ma. Dewleta tirke bi nê hawayî kena ke demografîya herêma ma bivurna. Ma derheqê ney de dosyayî pêşkêşê NYyî kerdî.''

Ehmedî da zanayene ke seba ke multecîyê sûrîyeyîjî Lubnanî ra bi asayî derbazê Rojawanê Kurdîstanî bibê heyetêk ameyo awankerdene û vat: ''Berê ma tim nê multecîyan rê akerde yê. Îdareyo Xoser do nînan pêşwazî bikero. La hetê bînî ra îmkanê ma kêm ê. Dewleta tirke her roje herême dana bombayan ver. Coka hewceyê ma bi destekê dezgehanê mîyanneteweyîyan est o. Multecîyê sûrîyeyîjê ke Lubnan de yê, hêrişanê dewleta tirke ra şîbî. Îdareyê Şamî seba agêrayîşê nînan pere wazeno. La seke mi vat berê ma tim akerde yo. Ma Lubnan de xora seba multecîyan komîteyêke awan kerde. 

Ganî hukmatê Şamî zî seba derbazbîyayîşê multecîyan hetkarîya ma bikero. Ganî hukmatê Şamî zî beranê xo abikero. Ma nika multecîyan bi îmkananê xo anê tîya. Eke cayê nînan est o, ma multecîyan cayanê nînan de cakenê. Ê bînî zî kampan de ca benê. Bi nê hawayî ma paştî danê şarê xo û karê derbazbîyayîşî asan kenê.''