Îdareyê Xoserî yê Rojawanî derheqê hêrişanê dewleta tirke û çeteyanê ci yê vera herême eşkerayîye daye. Eşkerayîye de ame vatene ke dewleta tirke huqûq û normanê mîyanneteweyîyî binpay kena û vera şaranê herême qirkerdişan kena.

Eşkerayîye de wina ame vatene: ''Dewleta tirke ya îşxalkere huqûq û normanê mîyanneteweyîyî binpay kena vera şarê ma yê herême qirkerdişan kena. Waştişê ci o yo ke kaosê Sûrîye ra feyde bikero û asayîş û îstîkrarê herême bixeripno.

Ewro dewleta tirke ya îşxalkere û çeteyanê ci reyna hêrişê xo yê vera herême fînayîşî çiman ver. Droneyanê çekdaran ê dewleta tirke û çeteyanê ci dewa Sefîya ya Eyn Îsayî de yewna qirkerdiş kerd û eynî keyeyî ra 8 kesî qetil kerdî. Di rojî cuwa ver zî Eyn Îsa de qirkerdişê bînî de 12 sîvîlî ameybî qetilkerdene. Ganî komel û rêxistinê heqanê merdiman ê mîyanneteweyîyî vera nê sûcan têgigêrê. Dewleta tirke na bêvenîya ra paştî gena û sûcanê xo giranêr kena. Semedê pawitişê sîvîlan û vindarnayîşê hêrişan ganî hêzê mîyanneteweyîyî cade tewir bigîrê.''

Îdareyî Xoserî ard ziwan ke ê bi nê hêrişan nêeşkenê  îradeyê şarî bişinê û vat ma  do bi heme îmkanan vera îşxalî xover bidê. Îdareyê Xoserî vat: ''Vera nê sûcan girdan ma do pawitişê şar û herra xo rê dewam bikerê. Fedakarîya şehîdanê ma do tim rayîrê têkoşînê ma yê azadîye û anorî roşna bikero.''