Dewrîyeyê tirk-rûsî yê rayîrê Heleb-Lazkîye (M4) ra verî artêşa tirke herême de 2 kesî kiştî. Goreyê zanayîşan artêşa tirke dewrîyeyê hemparî yê rayîrê M4î ra verî herêma Neyrabî de xîret kerd ke bendê ke rayîrî de bibî wedara. Çalakîkerê herême weriştî ra ke artêşa tirke bendan wenêdara. Artêşa tirke pê gazî hêrişê çalakîkeran kerd û çalakîkeran zî pê kerrayan cewab da.

Leşkeranê tirkan çalakîkeran û xeymanê herême ser o guleyî varnayî. Hêriş de 2 kesî merdî. Dezgehê Çimdarîya Heqanê Merdiman ê Sûrîye (SOHR) pare kerd ke di kesê ke nasnameyê înan nêameyî tesbîtkerdene kiştî.

Peymana Moskova

Şerê mabênê artêşa tirke û artêşa Sûrîye yê menga sibate ra dima Serekkomarê Tirkîya Recep Tayyîp Erdogan şibi Moskova û Serekdewletê Rûsya Vlademir Putînî ra waştbi ke adirbirnayîş îlan bikero. 5ê adare de peymana adirbirnayîşî amebî îmzakerdene. Qerarê peymane wina yê:

-Îdlîb de 6ê adare ra dima karê leşkerî do bêrê vindartene.

-Herême de rayîrê mabênê Heleb-Lazkîye (M4) de pê 6 kîlometreyan vakur de û pê 6 kîlometreyan zî başûr de korîdorêk do bêro akerdene.

-Nê korîdorî de 15ê adare ra dima dewrîyeyê rûs-tirkî do dest pêbikerê.

Alozîya dewrîyeyî

Labelê Heyet Tehrîr El Şam o ke El Nûsra ci rê rayberîye keno vera dewrîyeyî werişt payan ser. Alozîye ra semed dewleta tirke çend rojî verê cû hêzê xo yê polîsan erşawitbî herême. Heyet Tehrîr El Şamî zî hêzê xo yê çekdarî vera polîsanê tirkan de ca kerdbî.