Hêzê tirkî 28ê Teşrîna verêne ra hêrişê Girê Spî û dewanê Kobanê kenê. Goreyê hayîdarîya ke ANFyî çimeyanê bibaweran ra girewta xeylî çeteyê ke Îdlib, Şehba û Efrîn ra ameyî arêkerdene seba ke hêrişê Girê Spîyî bikerê roja 1ê Teşrîna peyêne Cerablûs ra ameyî ardene bi Tirkîye.

Ame zanayene ke seba Tirkîye înan meşrû bikero nê çeteyî binê nameyê “Têgêrayîşê Ahrar Şam”î de ardê pêser û unîformayê înan dayê înan ra.

ÇETEYÊ KE ÎDLIB, EFRÎN Û ŞEHBA RA AMEYÊ PÊSERDAYENE

Tirkîye destpêkerdişê şorişê Rojava ra çeteyî hemverê hêzanê kurdan de organîze kerdî. Nê çeteyî hêrişê hemverê Serêkanîyê, Efrîn, Kobanê û Cizîre de ameyî şuxulnayene. Çeteyê ke Îdlib, Efrîn û Şehba ra ameyê pêserdayene zî çeteyê El Nusra û yê DAÎŞî yê. Dewleta tirkî serkewtişê Minbicî ra dima 24ê Tebaxe 2016 de binê nameyê şerê hemverê DAÎŞî de têgêrayîşê îşxalê Şehba dabi destpêkerdene. Dima ra fam bibi ke çeteyanê DAÎŞî herdîşê xo taştê û binê nameyê “OSO” de verê dewleta tirkî de ca girewtê.

MÎYANÊ ÎNAN DE ENDAMÊ EL NUSRA ZÎ ESTÊ

Goreyê pêkerdişê roja 17ê Teşrîna verêne yê Soçî seba ke herêma bêsîlehî bêro viraştene Tirkîye rê gureyê tasfîyekerdişê cîhadperweran ame dayene.

Dewleta tirkî waşt ke çarçiwaya pêkerdişê Soçî de çeteyan razî bikero. Eyê ke nê pêkerdişî rê razî nêbî bi hemkarîya Cepheyê Xelasa Neteweyî û MÎTî waşt ke înan bi kiştiş tasfîye bikero.

Grûbanê çeteyan ra êyê ke Tirkîye şirawitî Efrîn Heyet Tahrîr Şam bîyî. Roja 18ê Êlule de 400 endamanê çeteyan ra qismêk ameyî şirawitene Cindires. Çimeyanê ma vat çeteyê ke seba hemverê Girê Spîyî de şer bikerê ameyê sewqkerdene bi Riha, mîyanê înan de qismêk çeteyê Heyet Tahrîr Şamî zî estê.