Sereka Heyetê Rayberdişî yê Mexlîsê Sûrîyeya Demokratîke (MSD) Îlhame Ehmed xebat, pêvînayîşê dîplomatîkî, xebatê komîteya qanûnê bingeyî yê serra 2020î û plansazîya serra newîye ANFyî rê ercnayî.

Îlhame ercnayîşanê xo de bale ante nê babetan ser:

''Xebatê seba demokratîkkerdişê Sûrîye dewam kenê la na babete de fikrê rejîmê Sûrîye hema zî nêvurîyayo. No zî beno sebeb ke krîz û kaosî xorin bibê. Şer, talan, koçberî, remnayî û kişîyayîşan ra şarê Sûrîye de qesawet virazîya. Krîzê Sûrîye xorin ê û bedelê ci zî giran ê. Na rewşe ra têna pê yew rayîr agêrîyeno. Eke Sûrîye abigêra xeta neweteya demokratîke, welat demokratîk bibo û şarî azad bibê krîzî qedîyenê.

Mîyanê serre de ma xeylêk blok û dezgehan reyde pêvînayîşî û xebatî kerdî. Nê xebatî xebatê stratejîk ê û ameyoxê Sûrîye eşkera kenê. Sey şarê Sûrîye heqê ma esto ke ma çareserîya xo eşkera bikerê. Xebatê form û dîyalogî, pêvînayîşê çareserîye coka girîng ê.

Îdareyo Xoser tecrubeyo verên ê Sûrîye yo. Wexto ke dewleta tirke hêrişê Îdareyê Xoserî kerd dinya vatêne projeyê Îdareyê Xoserî do çin bibo la wina nêbi. Şar wayîrê nê projeyî vejîya. Heyetê ke herême zîyaret kerde hetê sîyasî û dîplomatîkî ra manadar bîyî. Wextêk ra dima xoserîye do bişinasîya û bêra qebulkerdene. No deynê pêro merdimîye yo. Pêro dinya ganî deynê xo bida û paştî bida nê projeyî.

Pêvînayîşê ma yê bi Moskova dewam kenê. Eke Rûsya paştî bida projeyê Xoserîya Demokratîke no do bibo xelasê ci zî. Rûsya dekewena erdê rejîmê Sûrîye û faturaya xeletîyanê rejîmî zî Rûsya dana.

Rejîmê Sûrîye nika hetê fîzîkî û mezgî ra mîyanê vengîyêka pîle de ya. Rejîm herinda ke şarî reyde haştîye bikero dewleta tirke reyde hemkarîye keno. Rejîm waştişanê şarî fam nêkeno û hema zî meseleya ziwanê dayîke qebul nêkeno. Rejîm kurdan sey 'meyman' vîneno. Rejîm keno ke QSD sey terorîst bimojno û dişmenîya xo dewam keno. Na rewşe wextêkî ra dima do rejîmê Sûrîye bifatisna. Armancê ma têna vurîyayîşo demokratîk û azadîya şaran ê.

Berê sînoran de hema zî ambargo esto. Nê herêman de 5 mîlyon merdimî estê. Rejîm hetkarîya Neteweyan ê Yewbîyayeyan (NY) nêdano herêmanê bînan. Bi nê hawayî her kes xo rê keno muhtac û îqtîdarê xo dewam keno.

Ganî NY hetkarîye bido Îdareyê Xoserî. Îdareyo Xoser 7 serran ra nata hetkarîya 5 mîlyon kesan keno û mîyanê herêman de cîyakerî nêkeno. Beno ke wextê ameyoxî de NY û rayaumûmîya mîyanneteweyîye reyde tay peymanî bêrê kerdene.

Xebat û komîteya qanûnê bingeyî  mîyanê şaran de nê mîyanê dewletan de yenê kerdene. Êyê ke Tirkîya pê qayîl nîya tewrê komîte û xebetan nêameyî kerdene. MSD û Îdareyo Xoser nê xebetan de ca nêgênê. Ganî pêro temsîlkarê şaranê Sûrîye û muxalefetî tewrê ci bibê. Ganî qanûno bingeyî yo hempar bêro viraştene. Eke qanûno bingeyî hetê na komîte ra bêro viraştene do şaranê Sûrîye rê xizmet nêkero.

Ma serra newîye de armanc kenê ke xebetanê Îdareyê Xoserî xurtêr bikerê. Ma kongreya Îdareyê Xoserî de bire daye ke xebatanê rêxistin û awankerdişî geşêr bikerê. Ma do verê krîz û meseleyan bigêrê.

Serra newîye de armancê ma yê esasî nê yê ke ma do îşxalan biqedînê û têkoşînê xopawitişî dinya de bidê eşnawitene. Herêmê Xoserîya Demokratîke do bibê merkezê demokrasî yo hempar ê Sûrîye.''