Hemsereka Dayîreyê Karanê Teberî yê Rojawanî Îlhame Ehmed a ke ANFyî rê qisey kerd vat seba ke pêkerdişê mabênê Şam û Anqara bêro caardene ganî verî herra Sûrîye ya ke ameya îşxalkerdene tira bêro vejîyayene. Ehmede vat ganî rejîmê Şamî semedê nê israr bikero.

Îlhame Ehmed nê vatî: ''Dewleta tirke û rejîmê Şamî demokrasîyî rê akerde nîyê. Bedilnayîşî rê zî akerde nîyê.  Wird rejîm zî bedilnayîşî rê qefilnayeyî coka mîyanê xo de problemanê girdan ciwîyenê. Dewa û heqanê şaran nas nêkenê. Komelê nê wird rejîman zî tengayî anceno. Nika xîret kenê ke pêkerdiş bikerî. Tîya Rûsya û Iraq rol genê. Tirkîya vera Sûrîye polîtîkaya îşxal û îlhakî rayra bena. Dewleta tirke bi serran paştî daye çeteyan û xo sey dostê Sûrîye mojna ra. Nika zî mesajê pêkerdişî şaweno Şamî.

Sûrîye wazenê barê xo şenik bikero. Dewleta tirke zî wazena macîran ra bixelisîyo. Wazenê Sûrîye de estbîyayîşê xo bikero mende. Semedê nê zî wazenê îtîfaqanê verênan newe ra ganî bikero. Wina qeyde eşkena newera bikewo herra Sûrîye.  Wazena nê zî bi operasyonê leşkerî bikero. La eşkerayo ke verê pêkerdişanê înan de astengkerdişî est ê. Çunke ê xo ser nêeşkenê pêkerdiş bikerî. Ganî şarto verêne ê pêkerdişî o bi ke Tirkîya wa herra Sûrîye ra bivejîyo. Senî ke eseno rejîm semedê nê şertê xo de israr keno.  Xora ma wazenê wa rejîm gamanê neweyan bierzo û bibedilîyo. Wa heme multecîyî agêrê keyeyê xo, dewleta tirke herêmê ke îşxal kerdî tira vejîyo. Eke nêzdîbîyayîş wina yo xora meseleya Sûrîye zî yena çareserkerdene.

Komelê tirkan de nîjadperestîye tehlukeyo gird o. Macîrê Sûrîye zî bîyî mîyanê komelê tirkan. Propagandayê ke semedê tirkan yenê kerdene vera şaran nefret û kînî afirnenê. Wina qeyde verê şerê zereyî yeno akerdene. Çîyê ke vera multecîyanê Sûrîye ameyî kerdene netîceya nê sîyasetî ya. Ewro macîrê sûrîyeyîjî bizorî Tirkîya ra yenê vetene. Efrîn de demografî yena bedilnayene. Kurdan dewanê ci ra vejenê û herinda ci de ereban ca kenê. No sûc o, ganî hesab bêro persayene û cade vêrê nê bêro girewtene. Macîranê şerî şuxilnenê. Ganî heme şarê Sûrîye sey îttîfaqî vera nê bivejîyê. No semedê çareserkerdişê krîzê Sûrîye û anorê şaranê Sûrîye muhîm o.''