Temsîlkarê dezgehan, roşnvîran, hunermendan, huqûqnasan û rîsipîyê eşîranê kurdan Rojawan de vizêr Merkezê Kultur û Hunerî yê Qamişloyî de kombîyayîşêkê çapemenîye kerd û eşkerayîyêke daye.

Endamê Komîteya Amadekarîye Abdulwehab Xelîlî û roşnvîr Melav Resûlî bi kurdkî û erebkî eşkerayîye wende.

Eşkerayîye wina ya:

''Seba yewîya kurdan ê Rojawanê Kurdîstanî,

Vengdayîşê şarî yê seba yewîya neteweyîye ra dima ma sey kesayetanê komelî, terefanê sîyasîyan sey erkê xo dî ke cewabê nê vengdayîşê kurdan bidê, dîyaloganê mabênê kurdan de aver berê. No berpirsîyarîyê ma yê verê şehîdan o. Ma na xebate sey înîsîyatîfêkê komelkî îfade kenê. Ma nê înîsîyatîfî de menfaatê kesî yan zî partîyêke nêpawenê. No înîsîyatîf têna armanc keno ke yewîya neteweyî ya kurdan awan bikero. Nê madeyê pêroyînî fikrê şarê Rojawanî mojnenê:

-Sûrîye de raştîya şarê kurdî zaf kahan a û şarê kurdî erdê Rojawanê Kurdîstanî de pê haştîye kultur û şaranê bînan reyde ciwîyeno.

-Înîsîyatîf do paştî bido pêro vengdayîşanê seba yewîya neteweyîye

-Înîsîyatîf girîngîya pawitişê destkewteyanê kurdann bîyaro ziwan

-Înîsîyatîf do konferansêkê neteweyî yê Rojawanî bikero ke pêro hetî beşdarê ci bibê.

-Înîsîyatîf do seba pawitişê erdê Sûrîye zî xebate bikero.

-Seba nê madeyan ke cor de nusîyayî nêzdî de ''komîsyonêk'' do bêro awankerdene ke têgêrayîş rêxitin bikero.