Dewleta Tirkî ya îşxalkare dewanê Serêkanîyê rê hêrişanê giranan kena. Di dewan de tewr tay 30 îşxalkarî ameyî kiştene û tanqêk û xeylî wesayîtê leşkerî ameyî îmhakerdene. 3 sivîlî zî hetê îşxalkaran ra ameyî qetilkerdene.
Hêzê îşxalkarî yê Tirkî 9'ê Teşrîna Verêne ra nata hêrişanê xo yê verba sivîlan rê dewam kenê.
Îşxalkaran na reye sucêkê şerî dewa Dîbîşî ya qezaya Ziragî ya Serêkanîyê de kerd. Îşxalkaran dewe de 3 sivîlî qetil kerdî. 9'ê Teşrîna Verêne ra nata bi seyan sivîlî hetê îşxalkaran ra ameyî qetilkerdene. Înan ra tayî bi hewayêkê barbarî, tayê înan zî bî hewayêkê komî ameyî înfazkerdene.
Dewleta Tirkî adirbirnayîşo ke DYA û Rûsya reyd kerdo, bi hewayêkê eşkerayî binpay kena û hêrişanê xo yê verba herême rê dewam kena. Dewleta Tirkî ya îşxalkare û çeteyannê aye El Nusra û DAÎŞ Dişeme bi çekanê giranan dewa Firehan a Eyn Îsa rê hêriş kerd. Dewe ameye bombavarnayene. Dewa Kînî ya Eyn Îsa de şewa Yewşemeyî şervananê QSD'yî i hewayêkê pîtî cewab da hêrişê îşxalkaran. Şer de 6 çeteyî ameyî kiştene û 5 çeteyî zî birîndar bîyî. Dewanê Midbaxa, Mezrexa Mala Hemdoş, Dawudiye, Dirdara, Mubarekiye, Mirekis û Sikkeriye yê qezaya Zirganî ya Serêkaniyê de şewa Yewşemeyî îşxalkarî hêriş kerd. Şervanê QSD'yî zî çarçeweya pawitiş o meşrû de cewab danê hêrişanê îşxalkaran. Dewa Mubarekîye de şervananê QSD'yî cewabêko pît da hêrişan û netîce de 24 çeteyî ameyî kiştene û di wesayîtê ke hêriş de ameyî xebitnayene, ameyî îmhakerdene. Ame parekerdene ke dewanê bînan de zî şer qewimîyayo û îşxalkaran ra kişteyî û birîndarî estî, la netîce nêame tesbîtkerdene. Hêzanê îşxalkaran serê sibayî xîret kerd ke bikewê mîyanê dewa Midbaxa û şervananê QSD'yî cewab da hêrişan. Çeteyanê îşxalkaranê ke derbeyî werdî, neçarîye ra xo tepîya ant. Heman wextî de verba dewanê Sali û Til Qertelî rê hêriş ame kerdene û her di herêman de zî şer qewimîyayo.Dewa Babil Xêrî de peynîya hewteyî ra şerêko giran qewimîyeno. Şerê Yewşemeyî de bi desan îşxalkarê artêşa Tirkî ameyî kiştene û tankêkê înan ame îmhakerdene.
