Efrîn de 20ê çeleyê 2018î ra nata 646 sîvîlî ameyî qetilkerdene, 7554 sîvlî ameyî remnayene, mekanê tarîxî ameyî rijnayene û eserê ci ameyî remnayene û heme şehîdgehê ke şerwanê QSDyî û sîvîlî tede yê ameyî rijnayene.

Efrîn de Şehîdgehê Şehîd Seydoyî ke verê Şorişê Rojawanî ame ronayene wextê îşxalî de netîceya bombardumanî de ame rijnayene. Şehîdgehê Şehîd Refîkî zî pê destê multecîyanê ke  peynîya 2019 û sereyê 2020î de pê des Îdlîbî ra ameyî ame rijnayene. Şehîdgehê Avesta Xabûr ke wextê hêrişê îşxalî de ame ronayene  nîsane 2020î de bi makînayanê karî ame rijnayene û açarîya bazarê heywanan.

Dewleta tirke 14-15ê temmuze de bi makînayanê karî merkezê Efrînî de şehîdgeho ke şerwanî û sîvîlî tede yê kend û cenazayî vetî.  Ajansê Anadoloyî ke ajanso fermî yê dewlete yo bi xeberanê zuran no sey 'gorê komî' ramojna û îdîa kerd ke tede 'kesê ke YPGyî înfaz kerdî estê.' Na zura dewlete cade vejîyaye werte.  Dezgehê Şehîdan yê Herêma Efrînî û YPGyî pê dîmenanê arşîvî ê rîsîya vetî.

Şehîdgehê Şehîd Seydoyî verê Şorişê Rojawanî  qezaya Cînderesî de hetê efrînijan ra 06-05-2011î de ame ronayene. Wextê îşxalî de Îşxalkeran 3,6, 9ê  sibate de bi tangan topan hêrişê ci kerd û netîceya bombardumanî de ame rijnayene.

Şehîdgehê Şehîd Refîk zî şehîdgehê diyînî yê Efrînî bi. 2012 de efrînijan dewa Metîna ya qeza Şera de înşa kerd. Gerîlayê ke Vakur û Başûrê Kurdîstanî şehîd kewtêne tîya ameyêne definkerdene. Badê destpêkerdişê Şorişê Rojawanî şerwanê  YPG, YPJ û Cephet El Ekradî û sîvîlê ke şehîd bîyênî tîya ameyênê definkerdene. Şehîdgehê Şehîd Refîkî zî pê destê multecîyanê ke peynîya 2019 û sereyê 2020î de pê des Îdlîbî ra ameyî ame rijnayene. Zereyê nê şehîdgehî de nuqtayêka leşkerî ameye ronayene.

Bado ke bombardumanê tirkîya yê vera Efrînî bi giran efrînijan 29ê çeleyê 2018î de merkezê Efrînî ra nêzdî cayêk bi nameyê Şehîdgehê Şehîde Avesta Xabûr  şehîdgeho bîn înşa kerd. 12ê adara 2018î de dewleta tirke pê teyarayanê şerî şehîdgeh bombarduman kerd. Nîsane 2020î de bi makînayanê karî ame rijnayene û açarîya bazarê heywanan.

Şehîdgeho ke dewleta tirke sey gorê komî ramojnena o bado ke herişê îşxalî açarîyayî qirkerkerdiş û şehîdî zêdîyayî 115ê adara 2018î de nêzdîyê Nêweşxaneyê Avrînî de ame ronayene.

Îdarekarê Dezgehê Keyeyanê Şehîdan Adnan Şêx Muhammedî vat: ''Şehîdgehê bînî zaf dûrî bî rîyê hêrişanî ra ma nêeşkayêne biresê ci. Ma va tîya nêweşxaneyo nêdanê piro. Ma tîya şehîdgeh na ro û di merasîmî kerdî. Yew semedê sîvîlan yew zî leşkerî bi. 15ê adare de ma 43 şehîdê xo bênasname defin kerdî. Mîyanê înan de sîvîlî zî estbî ke dewleta tirke qetil kerdbî.  Tîya 73 şehîdê ma estê. Arşîvê ma zî esto ke zuranê Erdoganî pûç vejeno. 

Ma şehîdê xo bi merasîman defin kerdî. Ê cenazayê ke ê qala ci yena kerdene şehîdê ma yê. Şerwananê ma ke peyênîya teroro ke dinya tehdîtkerdene ard, her hetî ra ameyî naskerdene û heskerdene. Dewleta tirke wazena ke QSD, YPG û YPJyî yê ke Xoverdayîşê Dewrî de vera îşxalî xover da rayapêroyîya dinya de sey sûcdarî ramojno. La ê se kenê wa bikerê do ser nêkewê. Raştîye meydan de yê. Merdimê nê şehîdan nika Şehba de ciwîyenê heme do vejîyê qisey bikerê.''