Bi wesîleya serrgêra 100ine ya Serewedaritişê Şêx Seîdî yê 1925î Ewropa de çalakîyî do bêrê kerdene. Bernameyê çalakîyan hetê Komîteya Amadekarîye ya KNKyî, Komelê Îslamî yê Kurdîstanî (CÎK) û Enstîtuyê Kurdan ê Almanya û Belçîka ra do bêrê kerdene.

Hêverî 27-28ê hezîrane de paytextê Belçîka Bruksel de konferansêk do bêro kerdene û konferans de qalê serewedaritişê 1925î bêro kerdene. Konferans de Prof. Dr. Naif Bezwan, Doç. Dr. Zozan Pehlivan, Dr. Derya Bayir, Prof. Dr. Mesut Yegen, Dr. Seda Altuğ, Mehmet Bayrak û Doç. Dr. Selim Temo do qisey bikerê.

Babetê konferansî wina yê:

-1925 de atnosferê Kurdîstanî yo sîyasî

-Têkilîya mîyanneteweyîye ya xoverdayîşî û tesîrê ci yo dîplomatîk

-Asîmîlasyon û polîtîkayê surgunkerdişî

-Rolê Têgêrayîşê Azadîye û rêxistinîya kurdan

-Tesîrê xoverdayîşê Şêx Seîdî yê serê parçeyanê bînan ê Kurdîstanî

-Mîyanê hişê şarî, edebîyat û tarîxê fekkîyî de rêçê xoverdayîşî.

Konferansî ra dima 29ê hezîrana 2025î de şaristanê Kolnî yê Almanya de bi armancê yadkerdişê şehîdanê Serewedaritişê Şêx Seîdî, serkêşîya KNKyî de mîtîngêko girseyî do bêro kerdene. 

Komîteya Amadekarîye venga partîyan, dezgehan û kesayetanê kurdîstanijan da ke tewrê mîtîngî bibê.