Hêrişê îşxalî yê vera Rojawanê Kurdîstanî hîrê rojan ra nata bêmabên dewam kenê. Artêşa tirke ya îşxalkere waranê sivîlan dana bombayan ver, sûcanê şerî kena.

Hêzanê Asayîşê Zereyî derheqê hêrişanê 25-26ê teşrîna verêne de eşkerayîyêke daye.

Eşkerayîye de ame parekerdene ke hêrişan de firinî, dermanxaneyî, fabrîka û santralê ceyranî ameyê hedefkerdene û 7 sivîlî birîndar bîyê.

Eşkerayîye de dîya zanayene ke Qamişlo de santralê ceyranî, merkezê hacetanê înşaetî û dermanxaneyêkî dîyayî bombayan ver.

Rimêlan de fabrîkaya oksîjenî û bîrê petrolî û Dêrik de zî firinêk û fabrîkayêka pendîr-mastî dîyayî bombayan ver.

Minbic de dewê Ereb Hesen û Ewn El Dadatî dîyayî bombayan ver û domanêk zî tede 4 kesî birîndar bîyî.

Îşxalkerî Dêrik û Qamişlo de binawanîye danê bombayan ver.

Berê Ewn Dadatî yê Minbicî de bombarduman de 2 domanî birîndar bîyî. Ancî dewê El Derac, Ewn Dadat û Ereb Hesenî yê Minbicî dîyayî bombayan ver.

Dewa Til Qirahî û bajarekê Til Rifetî yê Şehba dîyayî bombayan ver.

Dewê Aqîbê û Bênê yê Efrînî û dewa Kefer Garisî ya Şehba dîyayî bombayan ver.

Bombardumanan ra Kantonê Cizîre û Kobanê de vera-vera ceyran birîyeno.