Dewleta Tirkan a îşxalkere bêmabên dewanê Til Temirî ser o bombayan varnena. Îşxalkeran serê sibayî dewanê Dawudîye û Êrişa ser o bombayî varnayî. Derheqê hêrişan de xeberê hîrayî nêkewtî destî. Dewê Til Temirî zî yenê bombavarnayene ke tede bi giranî asûr û sûryanî ciwîyenê.
 

Heman herême de roja çarşemeyî dewê Azîzîye, Til Tewilî û Dawudîye bi giranî ameyî bombavarnayene. Îşxalkeran  dewê Qasimîye, Rihanîye, Reşidîye, Rimone, Danyal Gego, Yelda, Tûma û Hebîb Qerezîane zî îşxal kerdî û dewijî neçare mendî ke koç bikê.

Dewleta Tirkan a îşxalkere cerganê xo reyde 9ê teşrîna verêne ra nat hêrişê Rojawanî kena. Çarçewa peymananê ke DYA û Rûsya reyde ameyî îmzakerdene tay cayî îşxal kerdî. Hêrişan de zaf sivîlî ameyî qetilkerdene, bi se hezaran sivîlan zî warê xo ra koç kerd. Gore raporanê rêxistinanê mîyanneteweyî hêrişan de kiştişê kome zî tede zaf sucê giranî yê şerî ameyî kerdene. Îdareyê Xoserî eşkera kerd ke sey çeka fosforê sipîye zaf çekê qedexekerdeyî hêrişan de yenê xebitnayene.