Vizêr reyna hêrişê dewleta tirke û çeteyanê ci yê vera Rojawanê Kurdîstanî dewam kerd.

Îşxalkeran dewanê Basla û Bênê yê  qezaya Şêrawa ya Efrînî hêgayê şarî tafînayî. Şewat herême ra vila bi. Rixmê mudaxeleyê şar û ekîbanê îtfaîye xeylêk erazî vêşaye.

Hetê bînî ra  qezaya Til Berakî ya Qamişlo de şewato ke dewanê Edanê û Xazokê de hetê çeteyan ra amebi vetene gerîya binê kontrolî. La xeylêk hêgayê xele û cewî vêşayî bîyî wele.

Îşxalkeran saetan şenî de zî bi topan hêrişê dewan Hisiyê, Hesecik û Semûqa yê Şehba kerd.

Reyna dewanê Qasimîyê û Rîhanîye yê Til Temirî de zî çeteyan hêgayê şarî eştê adir ver. Şewatê her diwan zî pera hêgayanê dewanê cîranan. Seba ke îşxalkerî hêriş kenê şar û ekîbê hewnakerdişê şewatî nêeşkayî mudaxale bikerî. No zî bi sebebê girdêrbîyayîşê şewatî.