Dewleta tirke ya îşxalkere 19ê teşrîna peyêne de hêrişê îşxalî vera Rojawanî reyna dayî destpêkerdene û nê hêrişan de bi taybetî Kampa Holî û Zîndanê Qamişloyî kerdî hedef. Hêrişê vera Kampa Holî de 8 şerwanê QSDyî şehîd bîyî û cergê DAÎŞî ke waştêne biremê hetê Hêzanê Asayîşê Zereyî ra tepişîyayî.

Kampa Holî de 60 welatan ra qasê 65 hezar kesî amennê û nê kesî cergê DAÎŞî û keyeyê înan ê. QSD, YPG, YPJ, Hêzanê Asayîşê Sereyî 28ê adare de vera cerganê Kampa Holî 'Operasyonê Merdimîye û Asayîşî' dabî destpêkerdene û sercergî zî tede 300 cergî tepiştbî. 25ê tebaxe de zî safhaya diyîne ya operasyonî dîyabî destpêkerdene.

Berpirsîyarê Çapemenîye yê QSDyî Ferhad Şamîyî derheqê tehlukeyanê Kampa Holî û zîndanan de cewab da persanê ANFyî.

Ferhad Şamîyî da zanayene ke DAÎŞ wazeno xo newe ra ganî bikero û vat: ''Nika Iraq, Sûrîye û Rojawan de têgêrayîşê DAÎŞî zêdîyayî. DAÎŞ dewan îşxal kena heta verê xo dana bajarekan zî. Bi taybetî Dêra Zorê, Reqa û Hesekê de tedayê DAÎŞî zaf ê. DAÎŞ seba ke xo newe ra ganî bikero binê nameyê zikatî de şarî ra pere arê dano ke xo fînanse bikero. Tay dewletî zî paştî danê DAÎŞî. Goreyê agahîyanê ke resayê destê ma 20 hezar cergê DAÎŞî vînîbîyaye yê. DAÎŞî Musil û Reqa de kadroyê xo yê esasî remnayî.''

Ferhad Şamîyî bale ante hêrişanê dewleta tirke yê vera Kampa Holî ser û vat: ''DAÎŞ hêrişanê dewleta tirke xo rê sey firsendî vîneno. Kampa Holî de îdarekarê DAÎŞî tepişte yê. Kampa Holî de qismê îdeolojî yanî perwerde û qismê leşkerîye est ê. DAÎŞ kampe de 2 baskan ra xo newe ra rêxistin keno. Kampe de cergî domananê 12-13 serreyan de zewijîyenê. Coka Hêzê Asayîşê Zereyî domanî kampe ra vejenê. Zîndanan û Kampa Holî de 65 hezar cergê DAÎŞî est ê la nînan ra teyna 12 hezar cergî tepişte yê. Hêrişanê dewleta tirke de mîyanê 20 rojan de 8 reyî DAÎŞî hêriş kerd. Dewleta tirke zî qestî ra Kampa Holî kerd hedef. Çunke mabênê DAÎŞ û dewleta tirke de hemkarîye est a. Reyna bi heman armancî dewleta tirke hêrişê Zîndanê Qamişloyî zî kerd. Ma nê hêrişî zî pûç kerdî.

Kampa Holî kampêka koçberan ra zêdeyêr vurîyaya bîya kampêka leşkeerîye. Ameyoxê Kampa Holî û zîndanan dîyar nîyo û nê cayî tehlukeyan pêşkêş kenê. Ganî nê cergî hêverî herêmanê ma de bêrê muhakemekerdene. Dewletê ke nê cergî hemwelatîyê înan ê, wazenê yew bi yew înan muhakeme bikerê la no raşt nîyo. Çunke qirkerdişo ke DAÎŞî kerdo, serebûtêko komkî yo û îdeolojîk o, çîyêko şexsî nîyo. Ma vera şexsêkî ney vera îdeolojîya DAÎŞî şer kenê. Hetê nika qasê 5 hezar cergê DAÎŞî hetê welatanê xo ra ameyî girewtene la 65 hezar cergê DAÎŞî hema zî welatê ma de yê. Ganî ya nê cergî bêrê muhakemekerdene yan zî hetê welatanê xo ra bêrê girewtene.''

Şamîyî eşkera kerd ke Koalîsyono Mîyanneteweyî bi zixmî paştî nêdano têkoşînê vera DAÎŞî û vat: ''Heta ke statu û nasnameyê herêma ma nêrê şinasnayene tehlukeyê DAÎŞî û dewleta tirke do dewam bikero. Koalîsyono Mîyanneteweyî yo ke 85 welatan ra yeno pê, ganî vera DAÎŞî û dewleta tirke destekêkê pîlî bido QSDyî.''

Şamîyî da zanayene ke ê do nêzdî de raporê serê hêrişê vera Zîndanê Hesekê vila bikerê û vat: ''Eşkera yo ke hêrişê vera Zîndanê Hesekê Îdlîb û Efrînî ra ameyo serebûrkerdene.''