Îşxalê dewleta tirke û cerganê yê vera Rojawanî de 300 hezar ra zêdêr kesî neçare mendî ke warê xo ra koç bikê. Şaro ke koç kerd hetê Îdareyê Xoserî ra kampan de û dibistanan de ame cadayene.

Şarê Girê Sipî û Serekanîyê hetê şarê Minbicî ra bi hawayêkê xurtî ame paştdayene. Şarê Minbicî berê keyeyanê xo seba 380 keyeyanê Minbicî akerdî. Dadîya 3 domanan Selma Abdulqadîr vat ke şarê Minbicî seba înan keyeyan peyda kerd. Selma îfade kerd ke cerganê ''Artêşa Mîlî ya Sûrîye'' yê dewleta tirke mal û mulkê înan talan kerdî û şar qir kerd.

Dadîya 5 domanan Eyşe Îbrahîma 38 serre ya ke dewa Til Xidirî ya Girê Sipî ra koç kerd ard ziwan ke ê do qet xo vîrî ra nêkê ke dewleta tirke senî bi hawayêkê barbarî înan ser o bombayî varnayî. Eyşe vat ke dewleta tirke rast a rast sivîlî xo rê kerdêne hedef û vera bêvengîya rayaumûmîya mîyanneteweyîye nêrazîbîyayîşê xo mojna. Eyşeya ke nika Minbic de keyeyê merdimanê xo de manena qala koçberîya xo kerde û vat ke ê têna wazena abigêrê keyeyanê xo.