Dimayê hêrişanê îşxalkaranê dewleta Tirkî nêzdîya 200 hezar kesan Serêkanîyê û Girê Spî ra koç kerd. Şaro ke wareyê xo ra şîyî da ard ziwan ke berpirsîyarê tewr pîlî yê ba îşxalê vera Rojawanî Amerîka û Rûsya yê.
Bi paştdayîşê û destûrê Amerîka û Rûsya artêşa Tirkî ya îşxalkare Girê Spî û Serêkanîyê îşxal kerd. Rîyê na îşxalkarîye ra 200 hezar merdimî neçar mendî ke wareyê xo ra bivejîyê.
Ofîsê Koordînasyonê Karanê Merdimî yê Neteweyê Yewbîyayeyî (OCHA) pare kerd ke dimayê hêrişan nêzdîya 180 hezar sivîlan herême ra koç kerd. Merkezê Rojawanî yê Cigêrayîşanê Stratejîkan (NRLS) zî da zanayene ke 200 hezar kesan koç kerd û înan her çîyî dimayê xo de verdayî. Nê hêrişan de 35'ê ci domanî 500 kesî şehîd bîyî.
200 hezar kesê ke înan koçê Hesekê, Til Temir, Eyn Îsa, Kobanê û Qamişlo kerd, dibistan, kuçeyan û camîyan de xo ver danê. Şerê Serêkanîyê ke mal û mulkê înan hetê çeteyanê dewleta Tirkî ya îşxalkare ra ameyî îşxalkerdene, vat na îşxalkarîye de suco tewr pîl ê DYA'yî yo. Hemwelatijê bi nameyê Îsmaîl Biludî vat ke mal û mulkê înan hetê çeteyan ameyî îşxalkerdene û berpirsê tewr pîlî yê na îşxalkarîye Amerîka û Rûsya yê. Îmam Mihemedî zî vat: "Tiya wareyê ma yo. Tîya de zafê welatê Îslamî û welatê bînî estê. Kesêk zî nê çiyan rê nêvano bes. Rûsya Efrîn, DYA zî Serêkanîyê rote. Serê ma de bazarîye kenê, ma naye qebul nêkenê."
Endamê NRLS'yî Dr. Ehmed Sînoyî da zanayene ke serra 2016 de hûmaritişê nufusî de 100 hezar û 504 kesî ciwîyayêne û nufusê Girê Spî zî bi qasê Serêkanîyê yo. Sînoyî vat; "Bi bernameyê qirkerdişo etnîk û vurnayîşê demografîyî têgêrenê."
