Qezaya Ehdasî ya Şehba de serkêşîya Meclîsê Kantonê Efrîn û Şehba de bi hezaran kesî semedê protestokerdişê tecrîdê serê Rayberê Şarê Abdullah Ocalanî û hêriş û tehdîtanê dewleta tirke vejîyayî waran.

Badê rayraşîyayîşî verê Kampa Serdemî de mîtîng ame kerdene. Tîya îdarekarê Meclîsê Kantonê Şehba û Efrînî Xebat Efrînî qisey kerd. Efrînî vist vîrî ke tecrîdê serê Abdullah Ocalanî serranê peyênan de bîyo giranêr û vat, ''Bîlasebeb cezayê dîsîplînî yenê dayene û pêvînayîşê avûkat û keyeyî yeno qedexekerdene. Bi mektubanê tehdîtî yê ke dîyenê Rayber Abdullah Ocalanî yeno vînayene ê nêeşkenê şarê kurdî Rayberîya  ci ra raqilnê. Rayber Apo sey kalbeyî ginayo sîneyê dîktatorîye ro, nêeşkenê fîkranê ci yê azadan çîn bikerê.''

Xebatî ard ziwan ke koçberê efrînijî û hemwalîtijê şehbayijî îdeolojîya Abdullah Ocalanî teqîp kenê û vat heta azadîya ey û xelisnayîşê cayanê îşxalkerdeyan ê do na xete de têkoşîn bikerê.

Endama Kongraya Starî Necahe Hisên zî vat ê do Abdullah Ocalanî teqîp bikerê ke cinîyan rê berê azadîye akerd.