Dewleta tirke ya îşxalkere 17ê adare de dewa Berxbotanî ya Kobanê de bi droneyê çekdarî û çekanê keyeyêko sîvîl hedef girewt û yewna qirkerdiş kerd.

Netîceya hêrişî de pîya bi 7 qijan maye û pîyê înan ameyî qetilkerdene û  2 kesî zî birîndar bîyî. Birîndaran Ronîda Osman Ebdo dima ra dinyaya xo bedilnaye û hûmara şehîdan bîye 10.

Kantonê Firatî ra bi tewrbîyayîşê seyan kesan şehîdê Kobanê Goristanê Şehîdanê Qirkerdişî  yê Taxa Şehîd Xebatî de bi slogana “Şehîd Namirin” ameyî definkerdene.

Merasîm de qiseykerdişî ameyî kerdene û ame vatene ke ê do semedê pawitişê herra xo têkoşînê xo xurt bikerê û  dewleta tirke ra hesabê qirkerdişan bipersê.