Hemserekîya Konseya Rayberdişî ya KCKyî derheqê qirkerdişê dewleta tirke yê vera Kobanê de eşkerayîye daye û nê vatî:

''Dewa Berxbotanî ya Kobanê de hêrişê dewleta tirke yê bi SÎHA û topan de eynî keyeyî ra hewtê înan domanî new kesî ameyî qetilkerdene. Ma nê hêrişê tersûnek û elçexî bi şîdetî şermezar kenê. Ma şehîdanê qirkerdişî bi hurmetî yad kenê û şarê xo rê serweşîye wazenê. Birînaran rê şîfa wazenê. No hêriş semedê heme kurdan bi sebebê dej û hêrsî. Ma zaf qehrîyayî. Dewleta tirke bi nê qirkerdişî yewna sûcê merdimîye kerd. Senî beno ke yew keye dadî-babî û pîya domananê xo yenê çînkerdene?No senî yew wîjdan, ehleq û aqil o? No gureyê zîhnîyetêkê  teberê merdimîye, kor, tarî yo. Dişmenîya vera kurdan dewleta tirke fînaya wina zemînêkê kor tarî, kerda cinawir.

Dewa Berxbotanî ke tede qirkerdiş ame kerdene verî zî hetê  DAÎŞî ra tede qirkerdişêko gird amebi kerdene. Nika dewleta tirke bi teyarayanê şerî qirkerdişêko bîn kerd. Na rewşe mojnena ke dewleta tirke senî yew planî rayra bena. No zaf muhîm o. Her kerdişê ci ra yeno famkerdene ke dewleta tirke wazena planê ke DAÎŞî nimcet verdayo, temam bikero.

Bado ke nêrazîbîyayîşê vera qirkerdişî zêdîyeyî dewleta tirke xosergirewtişê qirkerdişî ra remaye la no xapînayîş o. Dewleta tirke tim hêrişê Rojawanî kena, qirkerdişan kena. Têna rojêke çîn a ke bê hêrişan ravêro. Xora ê bi xo eşkera vanê ke do hêrişê her cayî bikerê, serûbin bikerê û seba ke çîyo ke vato bikerî tim hêriş kenê. Badê rijîyayîşê rejîmê Baasî hêrişê xo zêdînayî. No zî mojneno ke dewleta tirke nêwazenê Sûrîye de  çareserî bibo. Sebebê pêkewtiş û şerê Sûrîye Tirkîya ya.

Vera nê hêriş û qirkerdişanê teberê merdimîye yê dewleta tirke sere de şarê ma heme şarî û hêzê demokratîk û sosyalîstî û dostî gerek nêrazîbîyayîşê xo dahîna xurt bîyarê ziwan. Vera sûcanê merdimîye yê  dewleta tirke bêvengîya dewletan û sere de Neteweyê Yewbîyayeyan bêvengîya dezgehanê eleqedaran nîna qebulkerdene. Na bêvengîye yena manaya hemparbîyayîşê sûcan û qirkerdişan. Gerek no tewir hinî bibedilîyo, vera sûcanê dewleta tirke tewir bêro girewtene.''